Sûkanê Kurdistan de şaredariyê ke destê AKP de yê açaryayê sazgehê rantî. Şaredariyê ke xêlê îxaleyan ra perre qezenc kenê, la qe jew xîzmetekê werdî zî nêbenê şarî. Zey şaredariya qeza ya Riha Hêlwan. Rixmo ke qeza de şar mexdûr o, la ne rayî viraziyenê, ne xîzmetê aw esto ne zî xîzmetê bînî. Şaredariya Hêlwan 14 serrî yo ke destê AKP de ya. Welatijan aşkere kerdî ke heta nika înan şaredariya AKP ra qe jew xîzmet zî nêdiyo.Ronişteyan aşkere kerdî ke çend serriyo cadeyê Înonu, Cengîz Topel û Hastane de qe xîzmet nêbiyo û waştî ke şaredarê AKPyij yê qeza Aslan Bayik û Şaredarê Sûka Gird yê Riha Nîhat Çîftçî îstifa bikerê.
Veriya weçînayişan sozê her çî danê
Welatijo ke taxa Cengîz Topel de cuwyeno Yûsûf Kebecî vist vîrî ke, hefteya vernî varen (yaxer) variyayo û qeza açarniyayo cehenem. Kebecî diyar kerd ke çimê şaredar Bayik’î de welatijî çeba îfade nêkenê.
Kebecî aşkere kerd ke AKP dûştê weçînayinan şarî nêfikriyena, bado ke weçînayinî qedîyenê kes riyê înan nêvîneno û wina va: “Wextê weçînayinan de yenê, şarî xapînenê. Nê diriyî yê. Veriya weçînayinan sozê her çî danê, la senî ke wextê xîzmetkerdişî yeno werte ra vinî benê. Yûsûf Kebecî veng da Şaredariya Sûka Gird û yê Hêlwan û wina va: “Desinde sozê ke şima day şarî biyarê ca. Zewbîn peyniya şima do bîro.
15 serrî yo goniya Hêlwanijan ancenê
Welatijê bi nameyê Hamît Tedîm’î zî da zonayen ke qeza de, rîwalê kelmêşan cuya kewto zehmetî û a, mi xêlî hikûmetî dî, la mi zey hikûmeta nikayî ke şarî werdî vînena û heqaret kena nêdî. Tedîm’î vist vîrî ke ey zî dewra sifte reya xo da AKP û aşkere kerd ke 15 serrî yo AKP goniya Hêlwanijan anceya. Welatij Hamît Tedîm’î da zonayen ke qeza de ne gureyînê ray kenê, ne zî gureyînê bi fayde yê bînî û va: “Winî biyo ke, qandê (serva) kelmêşan gureyînê dermankerdişî zî nêramenê.
Welatijan ra Mehmet Çora zî şaredariyanê Riha û Hêlwan ra nêrazîbiyen damusna û da zonayen ke nê şaredarî şarî zey exmaq vînenê. Çora da zonayen ke, şar nê kerdenan vîneno. Ê vanê qey înan rê fina rey vejyenê? Şar do înan rê fatûreya va bibirno.
DÎHA/RIHA