Taybetê îqtîdarê AKPe ra pey ser hepsê nêweşî û şorişgerî zilm û zordarîye zêdîyay. Dijî nê hêriş û zilmê rayedarîye zî hepsê nêweşî zî xopawitiş rê çalakîya grewa vêşanî ra kewenî.
Rîzeye de herîş
Rayedarîya zîndanî her raşteyê ra hepsê sîyasî ra zilm kenî, destûr nêdanî ke hepsê sîyasî pirtûk û rojname biwanî û her roj yew baxaneye de lejker û gardîyanan hêrişê hepsîyan kenî. Tewro peynî lejker û gardîyanan Zîndanê Girewte ya Tîpa L ya Rîzeye de hepsîyan ra hêriş kerdî.
9’ê citmenge de rayedarîya zîndanî bira bedilnayîşê koxuşan da û hepsê sîyasî zî na bire ra îtîraz kerd labelê no îtîrazî hespê sîyasîyan ser zî rayedarîya zîndanî bira hêrişkerdişî girewt û peynîya hêrişê lejker û gardîyanan zî zaf hûmarîy de hepsê sîyasîye birîndar kewtî. Nê hêrişî lejker û gardîyanan hepso nêweş Murat Şîmşek bi silgerîya mektubî pêroyîya Tirkîyaye ra waşt pêhesno.
Rewşa hepsê nêweşî
Hepso nêweş Murat Şîmşek aşkera kerd ke peynîya hêrişê lejker û gardîyanan ê doktorî ra roporî girewtî, ser qewimyayîşî 1 aşme vîyart labelê rayedarîya zîndanî destûr nêdaya ke ê şîrê nêweşxaneye û wina vat: “Lejker û gardîyanan verê kamerayan ma ra hêriş kerdî û peynîya hêrişî zî pawitoxê ma amey zîyaretê ma û ambulans zîndanî ardî, çi heyf ke rayedarîya zîndanî destûr nêda ke ambulansan hepsîyan berî nêweşxaneye. Peynîya hêrişê zaf hûmarîy de embazê ma giran birîndar bîyî û nêeşkenê rayîrî de daxî bimeşî. Şîyîş û ameyişê înan ê nêweşxaneye de problem esto.”
Ma do heqê înan de gerraker bibî
Pawitoxê Murat Şîmşekî, Suat Şîmşek zî destnîşan kerd ke nika Zîndanê Girewte ya Tîpa L ya Rîzeye de 113 hepso sîyasî esto û sewbî heremî ra 40 hepso sîyasî zî surginê no zîndanî amey kerdişî û wina peynî kerd: “Xora no zîndan de her roj hepso sîyasî ra zilm û hêriş yeno kerdiş, polîtîkayê surginî zî her ke şono zêdîyeno. Nika rewşa hepsê sîyasîyan qet weş nîya. Ma wazenê ganî bi lezî hepsê sîyasîyan bêrê dermankerdişî. Ma do heqê rayedarîya zîndanî de gerraker bibî û çi ganîyo se zî ma do bikerî.”
DÎHA/EDENE