Vera xespkerdişê şaredarîyanê HDPyî de reaksîyonî her ke şono zêdîyenê. Hemserekê Partîya Demokratîke ya Şaran (HDP) yê Wanî Umît Dedeyî qisey kerd û vera xespbîyayîşê şaredarîyan de reaksîyon nîşan da.
Dedeyî qeyûmî sey dewamê polîtîkayanê çokronayîşî şinase kerd û wina va: “Prosesê muzakereyan ke hetê Rayberê Şarê Kurdî Abdullah Ocalanî ra ameyêne îdarekerdene ra dima vera Kurdan de şer dîya destpêkerdene Ewro bi nê qeyûman na polîtîka yena domnayene. Qeyûmî dewamê planê çokronayîşî yê. Tena qeyûm nê, qewimîyayîşê Idlibî, operasyonê Başûrî heme pabesteyê yewbînan ê.”
Dedeyî bale ante mesajê Ocalanî ser û wina va: “Birêz Ocalanî pêvînayîşê xo yo peyên de vatbi ke serra 93î ra nata heme gamê ke semedê aştîye yenê eştene, mîyanê dewlete ra tayê vernîya înan genê û hema hêzê înan ê şervetişî esto. Nê mesajî ra dima hîrê şaredarîyî ameyî xespkerdene. Verê cû bi grevanê vêşanîye tecrîd biney amebi wedarnayene û omidê aştî û çareserîye vejîyabi werte. Polîtîkaya qayûmî bi hawayo eşkera semedê qedênayîşê nê omidî bî. Hetêk ra zî seba ke karanê xo yê lêminan biniminî, înan dest şaredarîyan ser na.”
Qayûmî dewamê polîtîkaya çokronayîşî yê
Dedeyî peynîya qiseykerdişê xo de wina va: “Nê serranê peyênan de Kurd û şaranê Tirkîya ser zextî giran bîyî. Wan de konseptêko cîya yeno bicaardene. Hezar ra zafêr rojî yî ke qedexe tîya de esto. Çend walîyî bedilyayî la bajar de çîyêk nêbedilîya. Her walî bajar de çalakî û aktîvîteyan qedexe keno. Parlamenterî zî nêeşkenê bajar de têbigêrê. Qayûm xora dizdîya girde yo. Ma do nê qedexeyan qebul nêkerê. Xora Walî bi xo dizdîye keno. Coka qerarê qedexeyî û vengdayîşê ey semedê ma bêmana yo. Ma îradeya xo rê wayîr vejîyenê û ma do bi metodanê aştîye protestoyanê xo bidomnê.”
ANF / WAN