FETHÎ BALAMAN / MA/AMED
Kadrî Kaya ke 18 serran çapemenîya azade rê kede daye, 29ê Teşrîna Verêna 2018î de wefat kerdbi û emser serrgêra yewine ya wefatê Kayayî yo. Seke yeno zanayene ke Kaya hetê embazanê xo ra bi nameyanê ‘Seyda’ û ‘Mamoste’ ameyêne zanayene.
Kaya 18ê Nîsana 1999î de rojnameyê Ozgur Bakişî de dest bi xebetîyayîşî kerd. Kaya dima ra dore reyde rojnameyê Yenî Gundem, Yedîncî Gundem û dima ra zî awanbîyayîşê Ajansê Xeberan yê Dîcle (DÎHA) de ca girewt û Temsîlkarîya Amedî kerde. Kaya wezîfeyê temsîlkarîye qasê 14 serran domna. Kayayî hetêk ra kamera, fotografkêş, cîhazê qeydê vengî û sewbîna rojnamegeran rê peyda kerdêne û hetêk ra zî nê halêtan tamîr kerdêne.
Embazanê Kayayî ra rojnameger Mehmet Alî Ertaşî derheqê cuya Mamostayî de va ‘Kayayî 18 serrê xo dayî çapemenîya azade’ û wina dewam kerd: “Mamosta heme embazan reyde eleqeder bîyêne û seba çareserîya problemanê înan hewl dayêne. Kayayî computer, fotografkêş û kamerayê ke êdî nêameyêne bikarardene, newe ra tamîr kerdêne. Kaya bi dîsîplîn, vindetiş û cuya xo nameyê ‘Mamosta’yî girewt. Raşta zî mamostayê çapemenîya azade bi. Ma do ey xo vîra nêkerî û tim bidî cuyayene.”
Wexto ke nêweş bi zî ey moral dayêne ma
Şehmûz Tuncayî zî va ‘her vatiş û pratîkê Mamostayî perwerde bi’ û wina domna: “Ma seba kamera yan zî fotografkêşî bi rojan kede dayêne û ma netîceyê keda xo zî girewtêne. Mamostayî vîdayêkê zî nêeştêne. Makîneyê ke sey eşteyî ameyêne dîyayene, newe ra tamîr kerdêne. Wexto ke nêweş bi zî ey moral dayêne ma. Herçiqas ke nêweş bi zî waştêne ke bixebetîyo.”