Seke yeno zanayîş Serekkomar Erdogan çend rojî yo îdîayanê ‘ma kombîyayîşê PKKyî bombe kerd û 35 îdarekarê înan merdî’ û sewbîna dibare keno û medyaya hetgire zî nê îzehetan sey xebere pêşkêş kena.
Babete ser o Hemserekîya Konseyê Caardişî yê KCKyî îzehetêko nuştekî daye. Hemserekîya KCKyî dîyar kerde ke Erdogan zure keno û no temamî propogandaya weçînayîşî yo. KCK îzehetê xo de da zanayîş ke wa herkes bizano ke na zure ya.
KCKyî îzehetê xo de vato ‘Erdogan seba ke weçînayîşî qezenç bikero, zurêka winasî eşta orte’ û wina dewam kerdo: “Medyaya hetgire zî kerdo haletê na zure. Goreyê na zure kombîyayîşê ma ameyo bombe kerdene û 35 embazê ma şehîd kewtî. No bi tesilî hemleya weçînayîşî ya û Erdogano ke zano binkeweno, zurêka winasî eşta orte. Bi no hawa hewl dano rayanê nîjadperest û dişmenê kurdan bigîro. Na zure qesr de ameya amade kerdene. Muxalefet zî nêşêna vera zurêka winasî de bivejîyo. Eke bivejîyo o wext do vajî ‘şima zî hetê terorî de ca gênî’. Xora vera na zura Erdoganî de veng muxalefetî ra nêvejîya. Ma verê cû zî dîyar kerdbî ke Erdogan do seba qezençkerdişê weçînayîşî heme çî bikero. Na zure zî na çarçewa de ameya amade kerdene.”
Ganî ma partîyêka winasî ceza bikerî
KCKyî dewamê îzehetê xo de wina vato: “Wa heme şarê Tirkîya, hêzê demokrasî, dormeyê sîyasî û muxalefet bizano ke na zure ya. Hewl danî şarî bixapênî, cok ra ganî ma partîyêka winasî sindoqan de ceza bikerî. Ganî derhal Erdogan na zura xo aşkere bikero. Eke wina bibîyêne, tena medyaya hetgire nê, heme çapemenîye bikewtêne musabeqa mîyan. Cok ra wa ti kes teredut nêkero û dîyar bikero ke na zure ya.”
ANF/BEHDÎNAN