Şîrketê Peykê Eutelsat, ser waştenê RTUK a Tirkîye, seba padayîşê 3 qenalanê televîzyon yê Kurd Ronahî Tv, NewsChannel û Stêrk TV ferman da. Vera na fermanî reaksîyon û nêrazîbîyayenê sazgehanê çapemenî û temaşekerdoxanê nê televizyonan ramenê. Temaşekerdoxê televîzyonanê Kurd Eutelsat ra wazenê ke cewabê persa “Sebebê girotişê qenalanê Kurd” bido.
Peykê Eutelsat operatorê tewr pîl yê peyka Ewrûpa yo. Eutelsat seba 40 dewletan karê resnayiş, înternet û satalaytî bi kar arena û parzemînê Ewrûpa, Asya û Afrîka de resnena keyeyanê 165 mîlyonî însanan. Çîyo ke muhîm no yo ke, şirîkê no şîrketî yê Tirkîya kesê nizdîyê AKP yê. Eutelsat seba dewleta Tirk ke 3 peykan, heta serra 2020’î bişirawo feza, hadre kena. No zî yeno maneyê xêlê pereyan. Seba naye têkilîyê qilêrinan de hukmê nê pereyan keweno dewre û Ewtelsat zî bena amûrê nê menfîetanê qilêrîyan. Reyna rayverîya Eutelsatî de 2 kesî zî tirk ê. Nînan ra Alî Korur, wekîlê hetkarê serokê Herema Afrîka û Rojhelatê Mîyanîn û Omer Karataş zî seba midûrîyeta rotişî yê hereme ameyê wezîfedarkerdiş.
Têkilîya Tirkîye û Eutelsat
No rewş zî asta têkilîyanê mabêna Tirkîye û şîrketê Eutelsatî ya menfîetanê aborî nîşan dana. Na hemkarîya dewleta Tirk û Eutelsatî bibo nêbo xo de tay karê leyminan yê bazirganî zî arena. Balkêş o, Kovara namedare Der Spîegel ke Almanya de vejîyena, 4'ê Çileyê 2015’î de xeberêka bi sernuşteyê "Eutelsat Sûrîye û Îraq de karê înternet û peykan yê DAÎŞÎ serreraşt kena" resna wendakaranê xo. Xora hemkarîya DAÎŞ û AKP dinya de rewna ra yena zanayiş. Eutelsat mabêna 15 serran de tewr sênik 6 qorî qerarê vindernayişê weşana televîzyonanê kurdan da. La ecêbo ke heta nika înternetê DAÎŞî qet nêvindernayo.
Nimûneyê bînî
Serra 1999’î de Eutelsat reyna bi qerarêko sîyasî weşana Sazîya Radyo û Televîzyonî yê Sirbîstanî badê hêrîşê NATO yê verva Yûgoslavya, vinderna. Reyna weşana televîzyonê El Manar yê Hîzbûllahî, Lubnan de 5 serrî da vindernayiş. Serranê 2008 û 2010 de televîzyono ke hikumatê Çînî rexne kerdê û hebêko bîn ke Rûsya rexne kerdê vindernay. 2012 de weşana Roj TV da vindernayiş. Tewr peynî de aşma Nîsane de, Misir de weşanê Rabîa TV bi sebebo ke mabenê muxalîfan û îxtîdarî de meyldarîye keno, ame vindernayiş. Bi nê qerar û finakan eşkerayo ke Eutelsat şîrketêko destê dewletan de yo û weşanê televîzyonan bi goreyê polîtîkayê qilêrinan yê dewletan dano vindernayiş.
Vera qerarê Eutelsat Kurdistanijan xêlê cayanê Ewrûpa de nûmayîşê protestoyî viraştî.
NAVENDÊ XEBERAN