Roniştena diyîn yê dawa ke mahkemeya Bîngol de vîniya de, Hemserokê DBP yê Çewlig Mervan Temîz û Celîl Ûgûrlû, Mûrat Karaca Cahît Guven, Mehmet Ûlaş, Orhan Bayantemur, Ozcan Aydin, Mehmet Caf û Bedîrxan Bazencîr hadre bî. Fûrkan Taş û Mehmet Sarîtag ke girotxaneyê Sîncan de bî, bi sîstemê SEGBÎS girêdiyay ronişten. Ronişten de îdianameyê tepişteyan amey giroten. Tepişteyan bi kurmanckî û kirdkî pawitenê xo kerdî, îdiayan red kerdî û beraatê xo waştî.
Temîz’î îdiayê polîsan zûrî vet
Polîso ke zey şahit silayinê ronişten bi aşkere kerd ke, înan îxbarê çalakî girot û ser nay şî cayê biyayiş. Polîsî aşkere kerd ke, wexto ke ê şî cayê biyayiş, di kesî remay û înan zî Mervan Temîz, Celîl Ûgûrlû û Mûrat Karaca ke nezdiyê înan de bî girotî bin çiman û eşt wesayîta zirxî miyan. Peycoy Mervan Temîz’î qisey kerd û da zonayen ke, ê bi wesayîta zirxî nê, bi wesayîta Toyota amey binçimkerdin.
Tepişteyan zî hayr antî îfadeyanê nakok yê polîsan ser. Tepişteyan sûckerdişan qebûl nêkerdî û beraatê xo waştî. Pawitoxan zî aşkere kerdî ke derheqê muwekîlanê înan de delîlê sûcî werte de çinyê û waştena serbest verdayen kerdî. Heyetê mahkeme semedo ke delîlê sûcî nêdî qerarê serbest verdayenê tepişteyan da û roniştena dawa taloqê 13ê Nîsana 2016an kerd.
DÎHA/ÇEWLIG