Badê teşebusê derbe, OHAL amebî îlankerdiş û bi Qerarnameyanê Hukmê Qanûnî (KHK) bi deshezaran merdimî karî ra ameyî îxraçkerdiş û hende zî erzîyayî zîndanan. Kesê ke ameybî îxraçkerdiş, seba ke debara xo bikerî û alternatîfê xo awan bikerî, vera xo dayî karanê cîya-cîyayan. Hemserekê Sendîkaya Kedkarê Xizmetê Sosyalan (SES) yê Şûbeya Colemêrgî Musa Bor û Hemserekê Sendîkaya Kedkaranê Buroyî (BES) yê Şûbeya Colemêrgî Cemal Balikesîr zî nê kesan ra yî.
Seba ke her di hemserekî zî karê xo ra ameybî îxraçkerdiş, nika karê zîretî reyde mijûl benî. Hemserekan taxêk de hêgayêk ronayî û hêga de maydanoz, pîyaz, turp, havuç, brokolî, xase, kartol, gilgil, firingî, balcan, beşîla, îsot, kuye, hindî, xiyar û sewbîna xeylê çîyan resnenî. Babete ser o her di hemserekî qisey kerdî.
Ma alternatîfêk xelq kerdo
Hemserekan ra Borî wina va: “Ez nizdîyê 27 serran Nêweşxaneyê Dewlete de xebetîyaya. Ez KHKyo ke 22ê Teşrîna Peyêna 2016î de ame weşênayîş karî ra erzîyaya. Ma nika xo rê alternatîfêk xelq kerdo. Badê ke ma karî ra erzîyayî, sey zafaneyê merdiman ma zî vera xo da zîretî.”
Borî dewamê qiseykerdişê xo de va ‘yê ke herême de karî ra erzîyayî, goreyê kesê ke rojawan de karî ra erzîyayî, hîna şansin î’ û wina dewam kerd: “Çimkî rojawan de kesî hîna zaf zehmetî antênê. Yê ke ewja de karî ra erzîyayî bananê xo ra zî ameyî vetiş û ziqaqan de mendî. Labelê yê ma wina nêbî; şarê ma wayîrê ma vejîya. Ma hetê madî û manevî de tena nêmendî. Ma têkoşînê xo zî domnenî.”
Ma agêrayî
Cemal Balikesîrî zî va ‘hêgayo ke ma ramito, bi serran veng mend’ û wina dewam kerd: “Mi nizdîyê 10 serran karmendî kerd. Badê ke ez karî ra îxraç bîya, mi xo bi xo va ‘merdimo ke xelq nêkero, merde yo’ û mi dest bi karî kerd. Ma qerar girewt ke ma biagêrî ekolojî, zîret û xelqkerdiş. Nika ma newe ra dest bi cuyayîşî kerd.
Balikesîrî wina va: “Ma destpêk de biheyecan û tersayênê. Çimkî heta nika ma reya sifteyîne bîye ke çapa girewtêne xo dest. Labelê toximê ke ma ronaybî, nika netîce danî û ma meyweyanê înan bi çimanê xo vînenî. No zî ma bextewar keno. Çimkî ma bi serran ser mase de karmendî kerdbîy û bi raştî zî xelqkerdişî ra qerfîyaybîy.”
DÎHABER/COLEMÊRG