Wekîla HDPe Çaglar Demîrel hemverê hêrişanê AKP ya ke duştê şarî de dayo destpêkerdiş de ard ziwan ke nêy hêrişê topyekun î û wina domna: “Yew hetî ra koyî yenî bombekerdiş, birreyî yenî veşnayîş, cenazeyê domananê şarî nînî dayîş, ser Rayverê Şarê Kurd Abdullah Ocalan tecrîd yeno kerdiş û hetê bîn ra zî topyekun qetlîyam yenîy hedefgirewtiş. Şar êdî vano ‘Çîyo ke serranê 90’î de dema Çîller de ameynê kerdiş û eyro hukimat sey bireya qetlîyama topyekun girewto, heman çî yo. Ez sey kesa ke serranê 90’î cuyaya vana ke eyro 90’î ra xirabêr o. Serranê 90’î de kerdoxê nêdîyar estbi, daynê piro û remaynê. Labelê eyro dewleta huqiqî ney, sey dewleta polîs û lejkeran esta û qetilkaran xelat kena. Şar bi tedaya polîs û lejkeran rey rîbirî maneno.”

Qandê mergî xelat
Demîrel ciresna ke verê dewêy şarî ameynê veşnayîş û şar zî ameynê qetilkerdiş û wina domna: “Eyro zî heman çî yeno hedefgirewtiş. Kurdistan de polîs û lejker dewlet rayîr benî. Dewlet Kurdistan de polîs û lejker î. Polîs û lejker Farqîn de ma û pîyan ra vatî ke ‘ma çend zaf bikişî hende zaf xelat do bigîrî’

Nîşaneya tersî ya
Demîrel vat: “Cenî mîyanê heme ravêreyeya Tevgera Azadîya Kurdî de rol û mîsyonêy tewr girde kay kerdî. Gimgim de hemverê cenazeya Kevser Elturk(Ekîn Wan) a ke gerîlaya YJA-Starî ya sero îşkenceyo ke ame kerdiş nîno qebulkerdiş. Tîya de yew şer çin o, tena qetilkerdişê yew hetî esto. Ma no hedîseyî sey tersê ke hemverê têkoşîna cenîyan gênî dest. Çîyo ke hemverê cenazeya Ekîn Wan ame kerdiş hêrişê ke semeda şiknayîşê rumeta kurdan o.” 

Do cenî xover bidî 
Demîrel qalîkerdişê xo wina domna: “Cenî mîyanê xoverdayîşî de cayoke muhîm gênî. Kurdistan de, Farqîn de hêza pêşeng cenî ya. Êy ke hemverê qetlîyam xo kerdîy sîper û nêverday ke qetlîyama hîna girdêr virazyo zî cenî yî. Ez veng dana heme cenîyanê Tirkîya wa bêrî Kurdistan de çi yeno qewimyayîş biveynî.”

Sey Kobanê bî

Demîrel vat: “Eyro heman çî Gimgim û Farqîn de zî yenî cuyayîş. Ez bi xo şîya cayê hedîseyî, min dî. Çîyêy ke weyra de virazyayî Kobanî ra cîyayêr nêbî. Yew qetlîyam Farqîn de virazyaynê. Ger ke ma bi mayanê xo rey wextê ci de nêresaynê do qetlîyamêy hîna pîlêr bibînê. Na semedî ra ez mayanê ma ra spas kena. Licêyî de zî heman çî domyenî. Nika Licêyî tay dewijî vinîbîyaye yî. Hemverê erjanê şarî bêhurmetîyek esto. Mezelî bi bombeyan yenî xirabkerdiş, dikanî danî guleyan ver û veşnenî. Nînan hemînan polîs û lejker virazenî. Demo ke polîs cenîyan veynenî bi nîşandayîşî rey vanî ‘ma do şima serebirnî’ û zilmê DAIŞî hemverê şarî yeno xebetnayîş.” 

JINHA/AMED