Neheqîyê ke hepsîyê sîyasîyan rê yenî kerdiş, her roje hîna zêde benî. Bitaybetî teşebusê derbe ra dima bi îlankerdiş OHALî her roje hepisxaneyan ra xeberê neheqîyan yenî. Nê hepisxaneyan ra yewe zî Hepisxaneyê Tîpa Fyî yê Wanî yo.
Babete ser o Endamê Platformê Huqûqnasê Azadîwaştox Avûkat Umît Dedeyî qisey kerd.
Dedeyî va ‘muwekîlê mi Ferît Hasçelek wexto ke Hepisxaneyê Tîpa Fyî yê Wanî ra surgunê Hepisxaneyê Tîpa Tyî yê Wanî beno, semedo ke sehnayîşê rutî qebul nêkeno, rastê îşkenceyî yeno’ û qiseykerdişê xo win domna: “Her çiqas ke ez hedîseyî ra 4 rojî dima şîya, hîna zî nîşaneyê îşkenceyî estbî.”
Îdîaya bendê xozî
Dedeyî dewamê qiseykerdişê xo de bale ant îşkenceyî ser û wina va: “Hedîse wexto ke muwekîlê mi surgun beno, o wext kewtişê hepisxaneyî de dest pêkeno. Sehnayîşo rut hepsîyan ser de yeno ferzkerdiş, seba ke hepsîyî qebul nêkenî, îşkenceyê hepsîyan kenî. Îşkence ver muwekîlê mi xeriqîyeno û wexto ke xeriqîyeno ling û destê ci bi tarzê bendê xozî ke sey tarzê Hîzbullahî yeno zanayîş, yeno girêdayîş. Girêdayîşî ra dima reyna muwekîlê mi kuwenî û reya dîyine xeriqîyeno. Nêyî wextê 12ê êlule de zî ameyênê kerdiş û nînî qebulkerdiş.”
Ma gardîyan nîyî
Dedeyî bale ant kesê ke kuwenî ser û wina va: “Goreyê vatişê muwekîlê mi, kesê ke hepsîyan derb kerdî gardîyan nîyî. Xora ê kesan vato ‘ma gardîyan nîyî û no hepisxane do bibo hepisxaneyêko rastikên, nê rîyî xo vîr ra mekerê.’ Xora mi muwekîlê xo ra zî va, do derheqê nê kesan de doze biakero. Ma zî hem Dozgerîya Komare rê û hem zî Wezaretîya Edaletî rê muracat bikerî.”
WAN