Çalakîya grevê vêşanîye ke heme zîndananê Tirkîya de ameya destpêkerdene, dewam kena. Roja ke grev dest pêkerdo ra nata zîndanan de zextê ke estbî, hîna zaf bîyî. Nê zextan ra yew zî Zîndanê Bayburtî de ame cuyayene.
Ame musayene ke hepsîya bi nameyê Gulistan Yusmaya ke sewqê nêweşxane bîya, ewja de hedef nîşan dîyaya û ameya derbkerdene. Yusma yew serre verê parekerdişê aye yê medyaya komelkî ameyî mehnekerdene û tewqîf bîya.
Dayîka Yusma Behîye Yusma va ‘kênaya mi bîlasebeb tewqîf kerdî’ û wina domnaye: “No zî bes nêbi, surgunê Bayburtî kerdî. Ewja de kênaya mi de nêweşîyêk vejîyaye. Wexto ke kênaya mi şîye ewja 60 kîlo bî, labelê nika 45 kîlo menda. Hewteyo bîn kênaya mi sewqê nêweşxane kerda û ewja de cinîyêka gardîyane kênaya mi hedef nîşan daya. Kesê ke dormeyê de bîyî, hêrişê kênaya mi kerdî. Çi heqê înan esto ke wina kenî. Ma pey waştişê înan de yî û waştişê înan, waştişê ma yî zî. Ma heta peynî pey waştişê înan de yî. Ma vera înan de sere nêronenî.”
JINNEWS / MÊRDÎN