Hepsîyanê PKK û PAJKî ke 135 rojî yo grevê vêşanî de yî, çalakîya xo resna merhaleyêka newî û qerar da ke bikewê rojeyê mergî. Ewro ra tepîya 4 zîndanan ra 15 hepsîyî do çalakîya xo bi hawayo rojeyê mergî bidomnî. Hepsîyan veng da herkesî ke wa herkes vera faşîzmî de xover bido.

Vera tecrîdo ke Rayberê Şarê Kurdî Abdullah Ocalanî de dewam keno de çalakîyî dewam kenî. Çalakîya grevê vêşanîye ke Parlamentera HDPyî û Hemsereka KCDyî Leyla Guvene, Nasir Yagiz, hepsîyanê zîndananê Kurdîstan û Tirkîya, kesê ke Ewropa û Başûrê Kurdîstanî de daybî destpêkerdene, bêmabên dewam kena.   

Nînan ra hepsîyanê PKK û PAJKî grevê xo yê vêşanîye ke 135 rojî yo domnenî, resna merheleyêka newî û qerar da ke bikewê rojeyê mergî.

Babete ser o hetê hepsîyan ra eşkerayîyêk ameye dayene. Hepsîyan vato ‘sîstemê modernîteya kapîtalîste ke derdê ci yê demokrasî û heqîqete çin o, beno sebeb ke cimat de kaos vejîyo labelê hetêna ra bi polîtîkayanê xo peynîya xo zî ano’ û wina dewam kerdo: “Merheleya ke ma tede yê ramojnena ke şertê zîndanê Îmraliyî ke bi destê pawitoxanê sîstemê kapîtalîstî ameyê awankerdene bi temamî nê karakterê sîstemî dano teber. Vizêr hêzo ke zîndanê Îmrali de vera Rayberîya ma de tecrîdêkê giranî bica ardêne, ewro heman zihnîyet hetê heman sîstemî ra yeno dewamkerdene.”

Eke samîmî yî, wa tecrîd wedarnî

Hepsîyan eşkerayî de vato ‘vera nê tecrîdo ke serê Rayberîya ma de yeno bicaardene de çar parçeyê Kurdistan û Ewropa de xoverdayîşê rûmetinî estî’ û wina domnayo: “Na merhele de ma sey hepsîyê PKK û PAJKî yê ke zîndanan de yê seba wedartişê tecrîdî 135 rojî yo grevê vêşanîye de yê, ma zanê ke qerardarîya ma hewnê faşîzmî xira kena. Eke selahîyetdarê dewlete û Meclîs çareserîya problemê Kurdan de samîmî yî, wa tecrîd wedarnî û şertê azadî û xebatan bêrî viraştene. Herçiqas ke hende kesî grev de yî, labelê Meclîsî hîna Parlamentera HDPyî Leyla Guvene reyde nêkewto têkilî û îradeya şarî goşdarî nêkerda.”

Ma dest bi rojeyê mergî kenê

Hepsîyan bale anto grevê vêşanîye ser û wina vato: “Mîyanê nê rastîyan de ma vera hende bêhîsdarî û bêvengîye de qerar dayo ke grevê xo yê vêşanîye biresnê merheleyêka newî û 30ê Nîsane ra tepîya ma do çalakîya xo biaçarnê rojeyê mergî. Ma sey hepsîyê PKK û PAJKî ma do rojeyê mergî bi koordîne û bi heşmendî organîze bikerê. Nê bingeyî de teberê nameyanê cêrînan de do grevê ma yê vêşanîye yê bêdem-bêagêrayîşî zî dewam bikerê. Seba gamanê bicaardişê waştişanê ma muxatab embazê ma yê ke zîndanan de grevê vêşanîye de yê û embaza ma Leyla Guvene ya ke serkêşîya nê xoverdayîşî kerdebî yî.”

4 zîndanan ra 15 kesî estî

Hepsîyan eşkerayî de nameyê kesê ke bikewî rojeyê mergî zî dayî û wina vato: “Netîce de ma wazenê bêro zanayene ke qetîyen ma do xo nizdîbîyayîşanê şexsîyan ê fevrîyan ra dûrî bidê û bi terzêkê organîzekerdeyî tê bigêrê. Goreyê nê, 30ê Nîsane 2019 ra tepîya; Nesrîn Akgule, Şukran Aydine, Zozan Çîçeke (Zîndanê Bakirkoyî), Ardil Çeşme, Asli Dogane (Zîndanê Gebze), Ahmet Anigi, Ozhan Ceyhan, Vedat Ozagar, Îhsan Bûlût, Erol Çelîk (Zîndanê Wanî), Engîn Akhan, Enver Durmaz, Ahmet Topkaya, A.Haluk Kaplan, Ferhat Turgay (Zîndanê Amedî yê Tîpê D). Ma nê 15 embazî do dest bi çalakîya rojeyê mergî bikerê.”

Kilîdê cuya azade Rayber Apo yo

Hepsîyan eşkerayî de veng dayo herkesî ke wa bi hîsdarî hereket bikerî û wina qedênayo: “Ma bi heme zerrîya xo bawer kenê ke kîlîdê cuya demokratîke û azade Rayber Apo yo. Naye ra ma veng danê şarê xo ke Rayberîya xo rê wayîr vejîyê. Ma veng danê heme roşinvîr, nuştox, demokrat û akademîsyenan ke vera faşîzmî de xover bidê. Ma do serkewtişê xoverdayîşê xo tacîdar bikerê û qetîyen bi ser bikewê.”

 

AMED