Zîndananê Kurdistan û Tirkîya de her roje derheqê neheqî, zext, surgun û îşkenceyî de xeberê neweyî yenî. Nê zîndanan ra yew zî Zîndanê Tîpa Tyî yê Riha yo.
Hepsîyê bi nameyê Sedat Odumlu seba ke payan ser o hûmare nêdayo, bi 2 embazanê xo surgunê zîndanê Riha bîybî. Odumluyî mektûbêk erşawit û qala neheqîyan kerdo. Odumluyî mektûba xo de vato ‘badê ke ma surgun bîyî, seba ke embazan ra Orhan Çelîk welatîyê Almanya bi, 20 rojî ra dima ey neqlê koguşê sîyasî kerdî’ û wina domnayo: “Labelê ez û Dildar Oruk bi hawayo zorî ‘koguşê bêhetan’ de yenî tepiştene.”
Odumluyî vato ‘23ê Gulane ra nata ma waşto ke derbazê koguşê sîyasî bibî’ û wina dewam kerdo: “Waştişê ma bi mehneyê ‘Wezaretî ra destûr nêvejîya yan zî dozgerî destûr nêdaye’ ameyî red kerdene. Zîndanê Bidlîsî de seba ke ma payan ser o hûmare nêda, ma surgunê Riha bîyî. Labelê tîya de zî nîzamo leşkerî de hûmare dayene ma ser o yeno ferz kerdene. Wexto ke ma qebul nêkenî, ma yenî derb kerdene û ma tehdîd kenî. Waştişnameyê ma ke ma erşawitî Wezirîya Edaletî û Dozgerîya Komare zî nêerşawîyenî cayanê eleqederan.”
MA / AMED