Demanê peyênan de bitaybetî zîndananê herêma Çukurova de neheqîyî zaf bala merdimî ancenî. Serekê Komela Heqê Merdiman (ÎHD) yê Şûbeyê Edene Îlhan Ongurî qisey kerd. Ongurî da zanayene ke ê demanê peyênan de aye herême ra xeylê muracatî girewtî.
Ongurî ard ziwan ke derheqê binpaykerdişê heqan yê zîndananê Çukurova de îdîayê cîddîyî estî û wina va: “Çi komîsyonê xo dir çi zî embazê ma yê avûkatan dir pîya seva tespîtê halî û halkerdişê probleman ma xebatan kenê. Ma raporan amade kenê ke şar pê bihesîyo û sazîyê eleqedarî bikewê mîyanê têgêrayîşî.”
Ongurî ard ziwan ke bitaybetî zî dimayê îlankerdişê OHALî ra zîndanan de binpaykerdişê heqan bîyê vêşî û wina dewam kerd: “Bicaardişê ke teberê rûmetê merdimî de yê yenê dewamkerdene. Vernî ro heqê tedawî yê hepsîyanê nêweşan yeno girewtene. Nêweşê xeylî giranî yê ke ganî nêweşxaneyêkê bêkemasî de bêrê tedawîkerdene, tenya bi tedawîya dermanan zîndanan de yenê tepiştene. Mesela ganî hepsîyî hewte ra 10 saetî vejîyê cayê hewagirewtişî la tenya 10 rojan ra saetêk yenê vetene.”
Waştişê yenî peygoşkerdene
Ongurî peynîya qiseykerdişê xo de va ‘qiseykerdişê ma dozgerê zîndanî yê herême dir dewam keno û wina qedêna: “Seva ke binpaykerdişê heqan biqedîyê ma cehd kenê. Bitaybetî nê wextê peyênî de problemê hepsîyan bîyo problemêko cidî. Meseleyê hepsîyanê nêweşan meseleyêk ke bibo bazaro sîyasî nêyo, meseleyêko wijdanî û yê merdimîye yo.”
ANF / EDENE