Wextê derbeya leşkerî ya 1980î de Zîndanê Leşkerî yê Amedî de vatişê ‘Tirkî qisey bike zaf qisey bike’ ameyêne ferzkerdene û ewro zî ferzkerdişêko winasî Zîndanê Amasya de ame cuyayene. Hepsîyo bi nameyê Fethî Yaşa seba ke aşma Sibate de 3 mektûbê ke bi Kurdî ameyî nuştene erşawitî, îdareyê zîndanî ci ra 180 TL heqê çarnayoxî waşt.
Hepsî Yaşayî vera qerarî de îtîraz kerd û îtîrazê xo de wina vato: “Nizdîyê 5 aşmî verê mi bi ziwanê dayîka xo de yanî Kurdî mektûbî nuştî û erşawitî. 22 Temmûze de hetê îdareyê zîndanî ra teblîgatêk dîya mi û heqê çarnayoxî ame waştene. Ez bi serran o zîndan de mektûbanê xo Kurdî nusena û heta nika mi çîyêko winasî qet nêdîbi.”
Yaşayî da zanayene ke ey teblîgatî îmze nêkerdo û wina va: “Bi no hewa heqê îfade û ciresnayîşê mi ameyo astengkerdene. Verê cû mi ra nêamebi vatene ke heqê çarnayoxî yeno girewtene. Badê ke mi nuşto mi ra yeno waştene. No nîno qebulkerdene.”
Mehkemeya Cezaya Girane ya 2. ya Amasya qerar munasîb dî û îtîrazê Yaşayî red kerd. Yaşayî dîyar kerd ke o do qerar bikirêşo Mehkemeya Qanûno Bingehênî.
MA/ANQARA