MERKEZÊ XEBERAN Pêroyina Dinya de nêzdî 700 hezar kesê Vîrûsê Koronayî ra kewtê, seba îcadê derzîya Vîrûsê Koronayî bi seyan doktor û pisporê mîkrobîyolojîyî xebityenê la hetanî nika çareserîyêk nêame dîyîş. Hetanî nika ame tesbîtkerdiş ke 700 hezar kesê no vîrûsî ra kewtê la esil hûmara kesê ke no vîrûsî ra kewtê dîyar nîya, çimkî zaf kesê semptomê nê vîrûsî nîşan nêdanê û bi weşîye vîyarenê. Kuxika ziwa û adir Hetanî nika ame tesbîtkerdiş ke 100 kesî ke vîrûsî ra kewtê, înan ra yewe ci vîrûsî ra cuya xo dana. Nîşaneyê Vîrûsê Koronayî, kuxika ziwa û adir ê, tewro peynî goreyê cigêrayişan mabenê semptomê vîrûsî de nîşaneyê tehm û boye nêgirewtişî zî vejyayê. Domanê zî bi rehetî no vîrûsî ra kewenê la domanan de semptomê vîrûsî kêm yenê dîyîş. No vîrûs sifte bajarê Wuhanê Çînî de vejya û peynî zî nameyê COVÎD-19î girewt. Yeno vatiş ke bi ameyişê hamnanî do vilabîyayişê nê vîrûsî kêm bibo la no vîrûs welatê ke nika hamnan cuye de zî bi lezî vila beno, no zî nîşan dano ke no vîrûs hemnan de zî do vila bibo. Vîrûs do mutasyon bivîyaro Vîrûsê Covîd-19î enfeksîyonêkî sist o labelê seyî ra 20î de kesê ci bi giran vîyarenê, no zî zeyîfbîyayişê bexşenge û genetîkê merdimî ra qewimyeno. Sîstemê bexşengeya merdimî vera nê vîrûsî têkoşîn dano la hema zî tesbît nêbî ke vera nê vîrûsî sîstemê bexşengeya merdimî çiqas zirar vîneno. Zaf vîrûsî mutasyon viyarenê la asayî de vîrûsan zaf mutasyon nêvîyarenê la pisporan tersenê ke no vîrûs do motasyon bivîyaro û no dem do derzî zî no vîrûsî ra çare nêbo.