Parlamenterê HDP ê Amedî û ndamê Heyeta Îmrali Îdris Baluken, ke vejya vernîya mehkema nîyame texlîye kerdene. Balukenî roniştiş de vist vîrî ke heqê ey yê qanûnî û weşîye ame îxlalkerden. Dawa taloqê aşma Hezîranî bî.
Baluken ke 4ê Mijdare 2016î de girotîya bin çiman, 30ê Çile de serbest veradîya. La ser îtirazê serdozgerî 21’ê Sibate de reyna ame tepiştiş. Derheqê Balukenî de heta 18 serran ceza yeno waşten. Roniştişê Balukenî Mehkemeya Cezayê Giran yê 8. de amê vînayen. Baluken ke Girotxaneyê Tîpa F ê Sîncan de maneno, bi raya SEGBÎSî tewrê roniştiş bi. Parlementeranê HDP Feleknas Uca, Mahmut Togrul, Dîlek Ocalan, Meral Daniş Beştaş ra pîya Hemseroka KCD Leyla Guven, Parlamenterê DEPî yê verî Selîm Sadak û rayveberê HDP zî tewrê roniştişî bî. Dadgerî waşt ke seba delîl bîrê arekerden û derheqê dosya de agahî bîrê temamkerden, Balûken tepişteyî bîro mehmeke kerden.
‘Heqê qanûnî ame îxlalkerden’
Parlamenter Balukenî roniştiş de vist vîrî ke heqê ey yê qanûnî û weşîye, heqê destnêdayîşî, û heqê weçîntoxan ame îxlalkerden. Balukenî da zonayen ke zavayê Şaredarê Stenbolî Kadir Topbaşî rîwalê problemanê weşîye serbest veradîya û va, ‘La bi seyan tepişteyê nêweş nînê veradayen.
Îdris Balukenî dîyar kerd ke roja ke ameyo tepiştiş ra na het Girotxaneyê Sîncanî de, bin tecrîdî de ciwîyeno û vist vîrî ke prosesê ci yê dermankerdişî ameyo taloqkerden.
‘Sucdar kerdenan red kerd’
Balukenî pêrokîn ‘Sucdar kerdenê derheqê xo de red kerd û hina va: “Xeynê bernameyê HDP, mi propagandayê ti rêxistinêke bîn nêkerdo. Kişta hiqûqî û qanûnî de ti problemê no bernameyî çin o. Çîyê ke mi meclîsî de vatî û çîyê ke mi teber de vatî yew ê. Mercîya ke qerarê mehkemekerdişî bido, meclîs o.”
Parlamenterê HDP Baluken’î hayr ant referandûmî ser û wina va: “Referandumêî de şarî mesajeke gird da. Şarî dîyar kerd ke ê sîyaseta ke parçe kena qebûl nêkenê.” Balukenî destnîşan kerd ke zey HDP înan ser modela çareserîya xoserîya demokratîk, seba yewîya pêroyîya Tirkîye hereket kerd û ard ziwan ke ê bernameyê HDP pawenê.
Ganî dawa bikewo
Îdris Balukenî vist vîrî ke bingehê bernameyê HDP de Komara Demokratîk û Xoserîya Demokratîk esta û va: “Nayî ra qiseyê mi sûc nîyê û ez tehlîyeya xo wazena.
Balukenî ra dima pawitoxan, pawitenê muwekîlê xo kerd. Pawitox Reyhan Yalçindag Baydemîr vist vîrî ke dawa bêîtina ameya amadekerden. Yalçindag vist vîrî ke muwekîlê ci rîwalê qiseyanê xo yê meclîsî yeno mehmeka kerden û va rîwalê gureyê partîyeke sîyasî mehkemakerdiş nêbeno. Yalçindag waşt ke dosya û dawa bikewo.
Pawitox Mesût Beştaşî zî hayr ant hedefgirewtişê HDP ser û aşkere kerd ke bi îdianameyê dawa tesfîyekerdişê HDP yeno waştiş. Beştaşî heyetê mehkeme ra waşt ke goreyêmenfîetanê îxtîdar nê, goreyê prensîbanê hiqûqî hereket bikero.
Pawitişê pawitoxan ra dima heyetê mehkema qerarê dewamkerdişê Balukenî da. Dawa apey eştîya aşma Hezîranî.
DÎHABER/AMED