16ê Nîsane de referandûmêk ame viraştiş û seba ke xeylê hîle û kayî ameyî kaykerdiş, munaqeşe û reaksîyonî nêqedîyenî. Referandûmo ke tede bi hawayo akerde tirawitişê reyan ra bigire, heta xebetnayîşê reyanê blokan, reyna pusulayê bêmoran ra bigire heta zext û tedayê ke hêzê dewlete şarî ser de kerdî, hetê muxalefetî ra sey referandûmo şikin yeno şinasekerdiş. Babete ser o Endamê Musnayoxê Huqûqê Qanûno Bingeyî Prof. Dr. Osman Korkut Kanadogluyî qisey kerd. 

Kanadogluyî derheqê bêusûlîyê ke referandûm de ameyî kerdiş ser o va ‘goreyê madeya 79. ya qanûno bingeyî, derheqê îdare û denetîmê weçînayîşî de dezgeho selahîyetdar tena Heyetê Weçînayîşî yê Berzî (YSK) yo. Labelê YSKyî zî 16ê Nîsane de qebulkerdişê pusulayê bêmoran qanûnê weçînayîşî bi hawayo keyfî îxlal kerd. Ganî YSKyî goreyê Peymana Heqê Merdiman ya Ewropa hereket bikerdêne û pusulayanê bêmoran betal bikerdêne.”

Eşkîyeno biabo 

Kanadogluyî dewamê qiseykerdişê xo de va ‘goreyê madeya 79. ya Qanûno Bingeyî vera qerarê YSKyî de nêşkîyeno muracatê cayêk bêro kerdiş’ û wina dewam kerd: “Mehkemeya Qanûno Bingeyî (AYM) muracatê ke verê cû ameybî kerdiş bi hawayo teng şîrove kerdbî û muracatanê şexsîyan red kerdbî. Heto bîn ra muracatê şexsî tena weçînayîşê qanûn viraştişî de eşkîyenî bêrî qebulkerdiş, cok ra weçînayîşê herême ya verê cû de muracatê Mansur Yavaş û CHPyî ameybî redkerdiş. Seba ke AYM 2 astengîyê winasî vetî, qerarê YSKyî rê rayîrê AYMyî ameyo padayîş. Her çiqas ke rayîrê Mehkemeya Heqê Merdiman ya Ewropa (AÎHM) padaye biaso zî merdim bi muracatanê şexsîyan eşkeno nê rayîrî biakero.    

Ameyo îxlalkerdiş 

Kanadogluyî va ‘Sifteyîn heqê weçînayîş û weçînîyayîşî ameyo îxlalkerdiş’ û wina domna: “Heto bîn ra azadîya fikrî zî ameya îxlalkerdiş. AÎHM no het de eşkeno bêusûlîyê ke bi hawayo keyfî ameyî kerdiş, tespît bikero. Heto bîn ra Komîteya Heqê Merdiman ya Yewbîyaye (BÎHK) esta û na komîte muracatanê şexsîyan ser o cigêrayîş kena. Cok ra eke muracatê komîte bêro kerdiş, o wext do şansê serkewtişî hîna zêde bibo. Eke bêhuqûqî bêro tespîtkerdiş, hetê mîyanneteweyî de zaf muhîm o. Heto bîn ra nasnêkerdişê qerarê AGÎTî do zirar bido têkilîyanê ma.”


NECLA DEMÎR / DÎHABER / STENBOL