Siyasetkaranê kurd eynî wext di, eleqe ant talukeyan jî ser. Vat, eki dişmenîna vera Kobanê dewam bikiro, zirarê en gird dewleta tirk bivîno. Adirê Kobanê, vilayê Tirkiye bibo.
Eki dişmenîna vera Kobanê dewam bikiro, Tirkiyeya bi kaosê girda rî bi rî bimano. AKP û dewleta tirk goş nêda, vatenanê siyasetkaranê kurd. Ê vatenê bi niyetê rindî, zey blof hesibinay.
Vera heme wastenanê kurd, fek, goş û çimê xo girotî. Destegê qandê çeteyanê DAIŞ dewam kerd. Keverê sînorê Kobanê, hetanî peynî çeteyanê DAIŞ rê akerd.
Çetey kerdî warî û riştî Kobanê. Qandê vengkerdinê Kobanê heme çî kerd. Heta vengkerdinê Kobanê, zey alîkariyê însanîn ê qandê kurdan mûsna.
Îdîa kerd ki, ay keverê sînor akerdo û welatijanê Kobanê virar kena. Bi enê sextekariyana wast dinya û alemî jî bixapeyno.
Kurdistanijî vera enê siyasetê dewleta tirk bê veng nêmendî. Şî xeta sînor ê Pirsûs û Kobanê. Wija nobed girot.
Wast verniyê şiyayinê çeteyan ê Kobanê bigiro. Wija nobed girot. Xomûsnayinê demokratîkî viraştî.
Wija kurdistanijan bi xo, hesasiyetê xo ê qandê Kobanê ard ziwan. La belê dewleta tirk, zey siyasetkaranê kurd, goş nêda kurdistanijan jî.
Peyniya peynî di, sînorê sebrê kurdan ravêrna. Hêrsê kurdan kerf vêşî û kurdî teqnay. Kurdistanijê bi rojano xeta sînor di, xoverdayin viraştê, heme cayan weriştî pay.
Heme cay açarnay Kobanê. Heme cay kerdî qelayê serhewadayinî. AKP û dewleta tirk zey verî, nika jî serhewadayinan ra mesaja rast nêgirot.
Cayo ki, goş bido wastenanê kurdistanijan, hetkarînê bi hîzbul-kontra tercîh kerd. Winakerdina vat qayê, aya bişo kurdistanijan bitarsayno û verniyê serhewadayinan bigiro.
La belê, vera heme êriş û tedbîran, nêşa verniyê serhewadayinan bigiro.
Eki goş medo kurdistanijan û bi DAIŞ’a rakewtin dewam bikiro, şiyayinê linganê siyasetkaranê kurd jî, meşo AKP bireyno. Rakewtinê bi DAIŞ’a akerdinê mesafeyê mabenê kurd û tirkan o.
Memed DREWŞ