Hemserekê Kongreya Komelê Demokratîke yê Azade yê Rojhelatê Kurdistanî (KODAR) Fuat Berîtanî derheqê Kongreya Neteweyî de qisey kerd û vînayîşê xo ard ziwan. Fuat Berîtanî dîyar kerd ke ganî heme partîyê kurdan berpirsîyarîya ke kewena milê înan ser de, bîyarî ca.
Bi kongre çareser beno
Fuat Berîtanî qiseykerdişê xo de bale ant ser rolê kurdan û wina va: “Seba nêyî ganî kurdî kongre de bibî yewe. Ma ganî dormeyê Kongreya Neteweyî de bibî yewe. Eke kurdî Kongreya Neteweyî de bibî yewe, o wext eşkenî problemanê xo yê sîyasî ke bi serran o zîhnîyetê netewe dewlete reyde kom bîyî, çareser bikerî. No ancax bi projeyêko ortax û modelê çareserîya demokratîke mumkin o.”
Berîtanî qiseykerdişê xo de qala problemê ke mîyanê partîyanê sîyasîyan de estî kerd û wina domna: “Ez tîya ra reyna seba ke kombîyayîşê Kongreya Neteweyî bêra viraştiş, veng dana. Seba ke hêzê ma yê çareserî esto, ma eşkenî problemanê xo çareser bikerî. Hetta ma bi no hawa eşkenî çareserîya problemanê herême rê rayberî zî bikerî. Eke ma wina nêkerî, reyêko bîn ma nêeşkenî firsendêko winasî bivînî.”
Nêbî yewe ma tesfîye benî
Hemserekê KODAR’î Fuat Berîtanî peynîya qiseykerdişê xo de ard ziwan ke herême de bedilîyayîşê sîstemkî virazîyenî û qiseykerdişê xo wina qedêna: “Hêzê ke beşdarê nê bedilîyayîşan bibî, do têk şêrî. Ma amade yî ke her hetan reyde bêrî têhet û problemanê xo bi dîyalog çareser bikerî. Problemê cîddî yê ke vernîya ameyîşê têhetî yê kurdan de bibî asteng, çin î. Yê ke vernîya kongre de benî asteng wa baş bizanî ke nêeşkenî bi zîhnîyeto kehen mîyanê bedilîyayîşanê Rojhelato Mîyanên de ca bigirî. Bi no hawa ancax xizmetê hêzanê dagîrker û faşîstan bikerî, seba kurdan ti xêrê înan çin o. Cok ra ganî ma bi hawayo lez dormeyê Kongreya Neteweyî de bibî yewe.”
Kurdî eşkenî bibî modelêk
Fuat Berîtanî dewamê qisekerdişê xo de va ‘verê cû KCKyî seba Kongreya Neteweyî veng dabî’ û qiseykerdişê xo wina domna: “Ma sey KODARî goş da vengdayîşê KCKyî û partîyê ke bitaybetî Rojhelatê Kurdistanî de yî reyde ma ameyî têhet û ma pêvînayîşî viraştî. Ma wazenî ke heme partîyan bîyarî têhet û cepheyêko ortax awan bikerî û bi no hawa beşdarê Kongreya Neteweyî bibî. Şarê kurd krîzê Rojhelato Mîyanên de wayîrê hêzê çareserî yo. Kurdî wayîrê tevgerêko ke derheqê nê krîzî de wayîrê projeyêk î. No het de ganî tena seba çareserîya problemanê xo hewl nêdî. Lazim o kurdî seba şaranê Rojhelatê Mîyanên zî rayberî bikerî. Kurdî seba ke bişînbî nê projeyê demokratîkbîyayîşî bidî awankerdiş, ganî mîyanê xo de problemanê xo çareser bikerî. Eke wina bibo, o wext kurdî eşkenî sîstemê xo aver bîşêrî û seba çareserîya problemanê herême de bibî modelêk.”
HALÎT ERMÎŞ / RÊBAZ HESEN / ANF / SILÊMANÎ