Serê hewte de derheqê 40 parlamenteranê HDP, 4 parlamenteranê CHP, 1ê ci zî parlamentero kehen yê MHPyî ke amebî îxraçkerdiş de pêro pîya 45 fezlekeyî şî meclîse.
Fezlekeyê ke derheqê 21 parlamenteran de ameyî amadekerdiş mîyan de, derheqê Hemserek Demîrtaşî de 6, derheqê Verfekê HDPyî Osman Baydemîrî de 3, derheqê Wekîla Serekî ya Meclîsî Pervîn Buldane de fezlekeyêk esto. Dewrê verên yê qanûnviraştişî de derheqê parlamenteran de 600î ra zêde fezlekeyî ameybî amadekerdiş û nê fezlekeyê neweyan de her gama HDPyîyan bîya babeta tehqîqatî.
Derheqê Parlamentera HDPyî Çaglar Demîrele de seba ke qezaya Peyasî ya Amedî de parkêk de îzehet daya çapemenîye fezlekeyêk ameya amadekerdiş. Fezlekeya ke hetê Serdozgerîya Komare ya Amedî ra ameya amadekerdiş, seba ke Demîrele Cizîr de qetilbîyayîşê hende merdiman rexne kerda, yena sucdarkerdiş. Dozgerî na rexne sey ‘delîlê sucî’ nîşan daya.” Dozgerî nê vatişan ser o bi îdîaya ‘Şexse têkoşîno ke Komara Tirkîya vera terorî de dana sey şîddet, zulm û kayê lêmin şinase kerda û heqaretê dewlete kerda.” fezleke amade kerde û waşte ke destpironêginayîya aye bêro wedarnayîş.
Cenaze zî sûc o!
Parlamentera bîne ya ke derheqê aye de fezleke ameya amadekerdiş Parlamentera HDPyî ya Colemêrgî Selma Irmake ya. Fezlekeya ke hetê Serdozgerîya Komare ya Şirnexî ra ameya amadekerdiş de Irmake seba ke beşdarê merasîmê cenazeyê Mehmet Tunç û birayê ci Orhan Tunçê ke cêrzemînê Cizîrî de ameybî qetilkerdiş bîya û no beşdarbîyayîşê aye hetê Serdozgerî ra sey ‘Propagandaya rêxistine kerdene’ ameya şinasekerdiş.
Tepiştiş bî fezleke
Derheqê Parlamentera HDPyî ya Sêrtî Besîme Konca de zî fezleke ame amadekerdiş. Besîme Koncaya ke 2 reyan ameybî tepiştiş û 29ê gulane de newe ra ameye tewqîfkerdiş, babeta fezlekeya Koncaye zî çîyê ke wextê tepiştişî de Mudirîya Asayîşî de vatî ya. Koncaya ke 13ê kanûna 2016î de Anqara de ameybî tepiştiş û dima ra aye berdîbî Êlih, wextê kontrolê weşîye de polîsan ra vata ‘şima do hesabê nêyî bidî’ û no vatişê Koncaye bîyo babeta fezleke.
Kombîyayîş zî sûc o!
Fezlekeya ke derheqê Parlamentera HDPyî ya Mûşî Burcu Çelîke de ameyo amadekerdiş de zî yeno dîyayîş ke Çelîke seba ke beşdarê kombîyayîşo bi nameyê ‘Xebatê ‘Nê’ yê referandûmî ke Amed de ameyo organîzkerdiş bîya, no jew seba fezleke sey mehne ameyo nîşandayîş.
Herzewbîn mektube erşawitişê Çelîke zî bîyo babeta fezleke. Çelîke seba ke Mehmet Nurî Tîryakîyo ke Zîndanê Tîpa E yê Çankiri de grevê vêşanî de bî rê mektube erşawita, Serdozgerîya Komare ya Çankiri mektube erşawitişê Çelîke sey ‘propagandaya rêxistine kerdene’, ‘pesnê endamanê rêxistine dayene’ ra fezleke amade kerde.
Hepsî gerre kerdo
Fezlekeya ke derheqê Hemserekê Pêroyî yê HDPyî Selahattîn Demîrtaşî de ameya amadekerdiş zî bala merdimî ancena. Yeno zanayîş ke verê cû selahîyetdaran vatbî ‘Rojawanê Firatî xeta ma ya sûr a’ û derbazbîyayîşê hêzê YPG û YPJyî zî sey tehdît şinase kerdbî. Demîrtaşî zî vatbî ‘PYD do derbaz bibo û şima zî do biewnî’ û nê vatişê Demîrtaşî sey ‘heqaretê selahîyetdaran kerdene’ ame şinasekerdiş. La no tehqîqat bi muracatê Ahmet Davutogluyî nêameyo akerdiş. No tehqîqat netîceyê mektuba îxbarî ya Mehmet Gokçeyo ke Zîndanê Tîpa Lyî yê Alanya de maneno reyde ameyo akerdiş.
DÎHABER/ANQARA