Hemserekê DBPyî Mehmet Arslanî qiseykerdişê xo de bale ant rolê Ocalanî ser û wina va: “Bi hamleya stratejîke serkewtişo psîkolojîk kewt destê Kurdan. Her kesî dî ke heta ke Kurdî nêrê hesabkerdene sîyaset nêno kerdene. Ganî nika pozîsyonê ma yo ke sîyasetê Tirkîya dîyar keno, bibo.”
Hemserekê Partîya Herêmanê Demokratîkan (DBP) Mehmet Arslanî derheqê mesajanê Rayberê Şarê Kurdî Abdullah Ocalanî de ANF’yî rê qisey kerd.
Arslanî xoverdayîşê grevê vêşanîye yê 200 rojan o ke semedê wedarnayîşê tecrîdê serê Ocalanî ame viraştene vist vîrî û wina va: “No xoverdayîşêko bi biheybet û bianor bi. AKP tim vera Kurdan de polîtîya hêrişkare dano domnayene û wazeno ke şexsê Birêz Ocalanî de sîyasetê Kurdan bifetisno û vernîya Kurdan bigêro. Tesîrê Birêz Ocalanî ê serê sîyasetê Tirkîya û bitaybetî zî serê Kurdan yeno zanayene. Bi tecrîdî wazenê ke sîyasetê demokratîkî yê Tirkîya rê mudaxale bikerê. Hukmat tim serê Birêz Ocalanî ra polîtîya şantajî bica ano. Seba ke sîyaset û Kurdî vera naye tewirêko mende ranêmojnenê, hukmat zî naye ra paştî gêno. Eke ma rolê xo raşt kay bikerê, ma eşkenê nizdîbîyayîşê hukmatî yê vera Birêz Ocalanî de bibedilnê.”
Arslanî bale ante têkoşînê demokratîkbîyayîşî yê Ocalanî ser û wina va: “Birêz Ocalan serra 1993î ra nata semedê çareserkerîyêka demokratîke têgêreno. Birêz Ocalan çirey meseleyê Kurdî goreyê herême nêgirewt dest. Seba ke Kurdî her ca de heqanê xo yê sîyasî û kulturkîyan dest bifînî, mesele zaf bihet girewt dest. Coka bi hedefê welatanê herême. Ewro zî rixmo ke şertanê zehmetan de yo û newe binê tecrîdê xorî û dergî ra vejîyayo, firsendê verênî de berpisîyarîye û wezîfeyê dewlete û sîyasetê Kurdî fîneno înan vîrî. Veng dano dewlete û sîyasetê Kurdî û wazeno ke wa her kes wezîfeyê xo bica bîyaro.”
Meseleyê çar parçeyanê Kurdistanî pabesteyê yewbînan ê
Arslanî wina dewam kerd: “Nizdîbîyayîşê Birêz Ocalanî ê îdareyanê herêmîyan, Rojawan û sîyasetê Tirkîya heme pabesteyê yewbînan ê. Birêz Ocalan nê probleman zaf hîra gêno dest û meseleyê Kurdî de qet yew parçeyî yewbînî ra cîya nêkeno. Mesleyê çar perçeyan zî yewbînan ser o tesîr kenê û yewbînan weye kenê. Seba ke AKP heta ewro semedê Kurdan çîyêk nêkerd û vera Kurdan de polîtîkaya hêrişkare dana domanyene ewro Kurdan vera înan de raye xo şuxulnaye. Ganî hukmat naye ra dersêk vejo û goreyê naye têbigêro. Reyna CHP zî ganî mesajê hamleya stratejîke ya Kurdan raşt fam bikero û berpirsîyarîya xo bica bîyaro.”
Ganî HDP nika ra pey goreyê naye têbigêro
Arslanî bale ante muhîmîya rolê Ocalanî ser û qiseykerdişê xo wina qedêna: “Eke rayêk vînayîşê Birêz Ocalanî sîyasetê Tirkîya wina rehet keno, ganî îqtîdar vernîya ey abikero û heyetî sîyasî û dezgehê cimatê sivîlî zî ey dir pêvînayîşan virazê. Bi hamleya stratejîke serkewtişo psîkolojîk kewt destê Kurdan. Her kesî dî ke heta ke Kurdî nêrê hesabkerdene sîyaset nêno kerdene. Ganî nika pozîsyonê ma yo ke sîyasetê Tirkîya dîyar keno, bibo. Goreyê ma vernîya demokratîkbîyayîşê Tirkîya de problemo tewr gird meseleyê Kurdî yo. HDP ewro ra tepîya ganî naye bikero rojeva esasî û goreyê naye têbigêro.” n AMED