Xeylê cayanê Ewropa de xebatê piştîdayîşê HDP û Selahattîn Demîrtaşî dewam kenî. Welatê Almanya, Danîmarka, Fransa, Kanada, Swêd û sewbîna xeylê cayan de xebatê weçînayîşî bêmabên domîyenî. Semta İshojî ya Danîmarka de bi beşdarbîyayîşê Hafiz Ahmet Turhalliyî de werdê fitarî ame dayîş û kombîyayîşê şarî ame viraştiş. Turhalliyî tîya de qisey kerd û wina va: “Ganî kurdî kesê ke emrê mergê kurdan dayî ra hesab bipersî.” Bajarê Hamburg û Stuttgartî yê Almanya de zî panel ame viraştiş û vilawekî ameyî vilakerdiş. Namzedê HDPyî yê Çewligî Erdal Aydemîr, Parlamentera Partîya Çepî Cansu Aydemîre û sewbîna xeylê kesî beşdarê panelî bîyî. Panel de Erdal Aydemîrî va ‘ge-ge yew ray zî qederê weçînayîşî bedilneno’ û wina domna: “Cok ra ganî herkes bêro rayanê xo bixebetno. Seba welatêko adil ganî ma pêro pîya bixebetyî û qezenç bikerî.” Ganî ma dormeyê HDPyî de bibî yewe Paytextê Fransa Parîsî û bajarê Lorîentî de xebatê weçînayîşî dewam kerdî. Çarçewaya xebatan de veyveyêk ame zîyaretkerdiş û ewja de xebatî ameyî viraştiş. Zafaneyê veyveyî CHPyij bî, labelê veyve bi waro ke xebatê weçînayîşî tede yenî viraştiş. Lorîent de zî Komeleya Kulturê Elewîyan ya Morbîhanî de kombîyayîşêk ame viraştiş. Tîya de Serekê Rûmetinî yê AABKyî Turgut Okerî qisey kerd. Okerî va ‘eke ma nêwazenî vera dîktatorîye de sere ronî, ganî ma dormeyê HDPyî de bibî yewe’. Bajarê Toronto yê Kanada û bajarê Stockholmî yê Swêdî de zî xebatê weçînayîşî ameyî kerdiş. Seke yeno zanayîş 10ê Hezîrane de Kanada de do şewa piştîdayîşê HDP û Demîrtaşî bêro viraştiş, seba ci amadekarîye ameyî kerdiş. Bajarê Stockholmî de zî standêk ameye akerdiş. ANF / BRUKSEL