Qezaya Nisêbînî ya Mêrdînî de bi aşman qedexeya tebervejîyayîşê kuçeyan dewam kerd û dima ra her çiqas ke tesdîqê wayîrê mulkan çinêbî zî keyeyê taxijan ameyî rijnayîş TOKÎ dest bi xebatan kerde temelê bînayanê 5-6 qatinan eşte.
Ayşe Akkoya ke keyeyê aye Taxa Yenîşehîrî de bîye, qisey kerde.
Akkoye va ‘wextê qedexeyan de mi reyêk daxî keyeyê xo canêverda’ û wina dewam kerde: “Seba ke qedexeya peyêne de keyeyê ma zaf derbe girewt, ma mecbûr mendî ke keyeyê xo ra bivejyî. Ez nizdîyê 20 serran aye taxe de menda. Dima ra ma şîyî Qoser, labelê domanî ewja de deyax nêkerdî. Ma ameyî dûştê keyeyê xo de keyeyêk kîra kerd. Keyeyê ma yo verên de zaf keda ma estbîye.
Mi her roje temaşe kerd
Akkoye dewamê qiseykerdişê xo de va ‘mi dûştê keyeyê xo de her roje rijîyayîşê keyeyê xo temaşe kerd’ û wina domnaye: “Ma prosesêko zehmetin ra derbaz benî. Domanê mi nêzanî se bikerî. Bêrîya keyeyê xo kenî. Rijîyayîşê keyeyê mi, mi rê zaf zor ameyêne. Ma ra vanî ‘ma do keyeyanê TOKÎyan bidî şima. Keyeyê TOKÎ ma rê qîm nêkenî ke. Ma nêyî qebul nêkenî û ez nêwazena keyeyanê TOKÎ de bicuya. Ez hesretîya keyeyê xo ver bi desan reyan nêweş bîya. Ez zaf bêrîya keyeyê xo kena. Ez wazena şêra keyeyê xo, labelê destûr nêdanî. Ez keyeyê xo wazena, TOKÎ nêwazena.”
ŞÛJIN / MÊRDÎN