Hetê CÎSST (Sîstemê Înfazê Ceza de Komeleya Komelê Sîvîlan) / TCPS (Merkezê Xebatanê Hepisxaneyê Tirkîya) ra Unîversîteyê Mîmar Sînanî de konferansêk bi nameyê ‘Tirkîya de hepsî bîyayîş 2’ ame viraştiş. Moderatorîya konferansî avûkat Eren Keskîne kerde. Babete ser o avûkat Eren Keskîne, Burcu Çolake, Ezgî Dumane û krîmînologe Eva Tanze qisey kerdî.
Îşkence kemî nêbîya
Moderator Keskîne va ‘sehnayîşê rût, raybazê îşkence û yê tacîzî yo’ û qiseykerdişê xo wina domnaye: “Nê 30 serrî yo ke ez mîyanê têkoşînê heqê merdiman de ca gêna û merdim nêşkeno vajo ke îşkence kemî bîyo. Îşkence tim nê erdan de ameyo kerdiş û hîna zî domîyeno. Ganî ma nêyî ser o munaqeşe bikerî.” Keskîne ra dima Burcu Çolake qisey kerde û wina va: “OHAL ra dima şert û mercî hîna giran bîyî.”
Ganî bêro qedexekerdiş
Ezgî Dumane zî aşkere kerd ke ‘sehnayîşo rût îşkence yo û no hetê mîyanneteweyî de ameyo wedarnayîş’ û wina domnaye: “Goreyê mi sehnayîşo rût hetê zayendî de tacîz o. Nika goreyê krîterê Mehkemeya Heqê Merdiman ya Ewropa nêameyo sererastkerdiş. Sehnayîşo rût seba ti kesî nîno qebulkerdiş. Ganî ma wedarnayîşê sehnayîşê rûtî bîyarî rojeve.” Ronîştişê peyêne yê konferansî de Eva Tanze qisey kerde û qiseykerdişê xo de quralê Mandela rêze kerde û wina va: “Ganî sehnayîşî goreyê standardê mîyanneteweyî bêrî dîyarkerdiş. Seba ke sehnayîşo rût nêro kerdiş, raybazê ultrasyonî û yê bînî estî. Ganî no sehnayîş bêro qedexekerdiş.”
STENBOL