Ma serê Koyê Şengalî derîme la keysê rayeraşîyayîşî zaf çîn o. Mi xeylê bêriya rayeraşîyayîşî kerdo. Linge mi raye ancenê. Çimê mi nê lingê mi raye ancenê. Wazenê raye ra şorê. Tîja Teşrîne kî hende weş a ke mordem wazeno sey mor û milawina xo bido ver. Mi dî ke Saraye hawo veng a, miyan ra fetelina. Ez çerexiya bi Saraye û mi bi vengode bêbawer ci ra va:
-Ez wazena tayê bifetelî tayê raye ra şorî, ti bi mi ra bêrê? Hem ma qampa kî nasbikeme.
Na zaf weşa Saraye kî şîye fekê Saraye şî goşanê Saraye, bi huyayîşî va:
-Oh zaf weş o! De haydî ma şîme.
Seba ke keyfê Saraye nê fikrê mi rê ame ez zaf keyfweş bîya. Ma bê vindertîşî kewtîme raye. Ma xo verê holika ma ra veracêr da. Raye hama binê holika ma der a. Ma duştê holika ma de derbazê hetê raye yo bînî bîme. Ma verê xo da Qampa Xarpête. Qampa Xarpête nêzdîyê nêm seate dûrê cayê ma ya. Ma xo da mîyanê holikan, miyanê holikan ra şome. Binê linganê ma de herra nerm e.
Kam vecîno verê ma, qic, pîl ma selam dame ci. Ê kî bi keyfweşîye selamê ma gênê û bi germayî selam danê ma. Zaferîyê înan ma silayîyê çaye şimitîşî kenê. Êzîdî zaf meymanperwer ê. Eke şima ikramê înan biçerexnê zaf zereyê xo gênê. Miradînê. Ma cêrenime ver cêrenime ser înan îqna keme ke waxtê ma çîn o, karêde ma yo muhîm esto û rayeraşîyayîşê xo domneme.
Ma nêzdîye da-vîst deqa raye ra ya şîme ya nêşime bî hilke hilka Saraye. Saraya ma ya gence cîfpeysaye bîye. Saraye hîna hawtês serrî ya. Eke mi o halê Saraye dî ez pê huyaya û mi va:
-Yaaa şima gencî musayê erebeyan, qet raye ra nêşonê aye ra kî rayeşîyayîşode kilm de bîhna şima çiqîyena.
Ma têkîşte de raye ra şome. Saraye rûyê xo çarna bi mi û va:
-Ez terteleyî de yewendes roja bê mabên raye ra şîya.
Tîja Teşrîna weş e serê sereyê mi ra şîye. Hewrê sîyayî amayî.