Reîs-cumhurê tirkiye tayyîp erdoğan’î verra Kurdan fina-reyna startê herbê topyekun da. Bi rojano teyareyê herb yê tirk hardê pawitenê medya, mintiqeyanê gerîlayan û sivîlan bombevaran kenê. Zerreyê welatî de zî fina operasyonê qirkerdinê siyasî yenê ramiten. Tenya jew hefte miyan de hezar ra vêşî kesî amey binçimkerdin û tepiştin. Veşnayişê xozayê Kurdistan zî leteyê no herbê pêrokîn o. Herzewbîn HDP û parlamenterê ci zî hedefê erdoğan û akp de yê. Verra Rayver Öcalan’î zî polîtîkayê şantaj, tecrîdê girankerdî bi aşmano ramena.
Kamî û kamcî sebeban pêvacoyî ard no merhaleyî?
Netîceyê weçînayinanê 7’ê Hezîran îşaretê qedînayişê îxtidara AKP day. Herzewbîn raya xeyala serokîna erdoğan’î zî girotî. Cok ra erdoğan kewt dewre û operasyonê xelesnayişê îxtidara xo da destcikerdin.Sermiyanê akp yalçin akdoğan’î zî îtiraf kerd ke rîwalê ke Erdoğan nêbi serwezîr pêvaco qediya. Zey ke HDP zî ard ziwan; herbo ke nika yeno ramiten eleqeyê xo bi welat ra çinyo. Herbo ke yeno ramiten serva îxtidara akp û menfaatê saray a erdoğan’î yo. Cenazeyê ke badê çend serran jû bi jû reyna yenê, benê qurbanê waştenanê erdoğan’î. Senaryoyê no herbî zî Saray de ame plankerdin û jû rojî de atmosferê herb ame ronayin. Zey ke na îxtidar veriya coy hêç qalê muzakere, çarekerdina meseleya Kurd nêkerd, zey ke Îmrali de pêdiyayinî nêviraziyay, zey ke 28’ê Sibatî de mutabaqatê Dolmabahçe nêame aşkere kerdin, zey ke yalçin akdoğan’î îmze nêeşt binê na mutabaqatî, zey ke erdoğan’î nêva ‘serva çarekerdi hewce bikero ez do axuyê baldiran bişima’ jû rojî de sermiyananê hikûmet her çî înkar kerdî. Nika jû fekî ra vanê ‘ma dê teror biqedînê’, ‘muzakere çinyo’, ‘mutabaqat xeyalo, ‘HDP do bedelê giran bido’ û tehdît kenê… Netîce de erdoğan’î welat ard merhaleyê da zaf talokeyî. Zey ke hemserokîna konseya rayverîn yê KCK aşkere kerd; “erdoğan wazeno rejîmê faşîst yê 12’ê îlonî newede ra restore bikero, yanî rihê demê derbe ganî bikero. Xo ra bêhiqûqîn û îxlalê heqê merdiman yê ke tenya çend rojanê peynî de benê wextanê derbe ra kêmî niyê.
Sebebê bîn û esasî yê herba topyekun û êrişanê akp zî hesabê weçînayinê rewî yo. Erdoğan’o ke 8’ê Hezîran’î ra heta na het hewn nêkewto çimandê ci welat zerreyê krîz-kaos û herbî de beno weçînayinan. Wazeno şansê xo fina bicerbno. Heta ke Erdoğan nêbo serwezîr do rehatey nêdo welatijan. Hêrs û hêrişkariya erdoğan’î esasî de ters ra yena. No tersayişî de zî heqdarî yê. Çi ke wexto ke erdoğan û ekîbê ci tenya nêbê îxtidar nêşenê xezîneya dewlet bidiznê û bûrê. Nêşkenê serê suc, bêhiqûqînanê xo bigîrê. Nêşkenê mahkemeyê sucê merdiman yê mavênnetewî ra bixelesyê. Mesela, zey sucê peynî; gerek erdoğan û hikumeta ci hesabê destegdayişê DAİŞ bido. Çike DAİŞ wextê do derg o her roj sucê merdimî keno. Pêrokîn dinya DAİŞ zey çeteyê qetilkar û tecawizkar silasneno. La DAİŞ nê pêrokîn sucan bi destegê hikûmeta erdoğan’î kerd. Herbê verra DAİŞ zurrê da gird û boçikîna. Heta nika akp ne hetê eskerî ne zî hetê hiqûqî jew çeteyê DAİŞ zî hedef nêgirot. Bin maskeyê DAİŞ de erdoğan verra hereketê serbestî yê Kurdan herbê da hera rameno. Çapemeniya erdoğan’î zî xo ra no konseptî rê hadre bî. Na çapemeniya ke herb, kiştiş, gonîrijnayiş rê kêfweş bena fina xeberê zûrrî, manîpulatîf û hetkarî destpa kerd. Pêrokîn performansê xo serva polîtîkayê herb yê akp xorîn bikero seferber kena. Hewna teyareyê lej teyaregeh ra nêwerziyayê, manşetan erzenê vanê; ‘qerargehê Karayilan’î piro day, destê raş yê Karayilan’î ame kişten, Duran Kalkan, Cemîl Bayik, Bahoz Erdal nêzana sebi. Hendayî berz erzenê çi ke zûrrî bi pere niyê.
Verra no konseptê herbê topyekun raştî de zî tenya jû ray esta; a zî xoverdayişê topyekun a. Gune pêrokîn çorme û şarê azadîwaşt telewe bibê û raya talokeyî yê erdoğan’î bigîrê. No herbê sifte-ewil niyo. Heta nika dewleta faşîst 40 serriyo bi seyan reynî herb îlan kerd, la vinî kerd. Pêrokîn hikûmetanê bînî zî bi seyan teyareyan hêriş kerdî, bi hezaran dewan veşnay, bi hezaran Kurdan kiştî. Bi desan fermandaranê artêşa tirk talîmatê herbî day. La se bi? Ê hikûmetan û fermandaran bi xo vinî kerdî. Nika zî hikûmeta akp zî şansê xo yê peynî ceribnena, la peyniya xo ana. Tenya wa meydanî veng nêmanê û xoverdayişê ma biramo…