Weqfê Kultur û Perwerdeyî yê Erenlerî seba ke mesrefê Cemxaneyê Erenlerî hetê Wezîrîya Karê Dîyaetî ra bêro dayîş doze akerdbî. Mehkeme waştişê weqfî heqdar dîybî û qerar daybî ke mesrefê cemxaneyî do hetê dewlete ra bêrî dayîş. Herçiqas ke qerarêko winasî esto, reyna zî Şîrketê Cereyanî BEDAŞî cereyanê cemxaneyî birna.
Babete ser o Serekê Weqfî Emîn Yilmazî qisey kerd û reaksîyon nîşanê nêyî da.
Yilmazî va ‘selahîyetdarê BEDAŞî xebere nêdayî ti kesî û cereyanê ma birnayî’ û wina domna: “Mi qerarê mehkeme nîşanê înan da, reyna cereyan veradayî. Herçiqas ke qerar esto, reyna zî BEDAŞ tim ma eciz keno. Goreyê nê qerarê tedbîrî, heta mehkeme netîce bibo, ganî bêro pawitiş. Labelê selahîyetdarê BEDAŞî tim yenî ma tehdît kenî.”
Cemxaneyî sucdar kenî
Yilmazî dewamê qiseykerdişê xo de va ‘BEDAŞî abonetîya ma betal kerdo û bi no hawa sey ke ma cereyano qaçax xebetnenî nîşan dano’ û wina dewam kerd: “Hewte de 2 reyan bitelefon ma gêrenî û vanî; şima bi hawayo qaçax cereyan xebetnenî, ma do heqê şima de tehqîqat bidî destpêkerdiş. Ma do selahîyetdaranê BEDAŞî rê zî doze biakerî.”
STENBOL/DÎHABER