Herinda 12 kesan de 30 kesî manenî

Goreyê Wezîrîya Edaletî,  Tirkîya de 449 zîndanî estî û kapasîteya înan qasê 211 hezar û 274 kesan a. La rixmê naye 35 hezar û 152 hepsîyî na kapasîte ra zêdeyêr manenî. Îdarekaranê Sîstemê Cezaya Înfazî de Komela Cematî ya Sîvîle (CÎSST) ra Berîvan Korkute qisey kerde.

Korkute dîqet ante îxlakerdişê heqan yê zîndanan ser û wina va: “10 serranê peyênan de zîndanan de hûmara hepsîyan zaf zêde bîya. Koguşanê 12 kesîyan de 30 hepsîyî manenî. Cayê rakewtişî çin o. Hepsîyê nêweşî bi aşman nêresenî nêweşxeneyan. Meseleyê ke zîndanan de benî tena bi merdimanê hepsîyan û çend komelan çareser nêbenî. Ganî her hetî ra şar eleqe ramojno, paştî bidê hepsîyan. Eke ma pêro pîya têbigêrî, ma eşkenê nê meseleyan çareser bikerî.”

Hemsereka Komela Paştîdayîşê Zîndanan Selma Altane zî dîyar kerde ke zextê ke bi ameyîşê OHALî dest pêkerdbî, çend şino vila benî û wina domnaye: “Bitaybetî zî hepsîyê sîyasîyan ser o zext zaf o û no bi talîmatê Wezîrîya Edaletî beno. Heme zîndanan de gardîyan û cendirmeyî seba provokasyonî heqaretê tepişteyanê sîyasîyan kenî. Xora hepsîyê nêweşî mergî rê terk bîyî. Sewqê nêweşxaneyî nêbenî û şertanê xiraban de yenî tepiştene.”

Hetê bînî ra ame musayene ke hukmatê AKPyî fatûraya krîzê ekonomîke zî barê hepsîyan kerda. Zîndanê Wanî de bi aşman o hepsîyî tena nano wişk, berxul û şorbe wenî.

 

ANF / BRUKSEL