Amedspor ke par zaf reyan raştê hêriş û qedexeyan ame, emser zî musabeqaya xo ya yewine de zî bi qedexeyan dest pêkerd. Hêrişê nîjadperestî ke par vera Amedsporî de bîyênê, emser zî dewam kerdî.
Herçiqas ke Amedspor problemanê ekonomîkan cuyeno û raştê hêriş û qedexeyan yeno, reyna zî serkeweno. Tewr peynî Amedspor vera taximê Mersîn Îdman Yurdu de serkewtişêko gird qezenç kerd û 7 golî eştî ci. Amedspor nika lîg de rêza yewine de yo.
Hemserekê Amedsporî Nurullah Edemenî derheqê hêriş, qedexe û serkewtişan de qisey kerd û reaksîyon nîşan da.
Nê hêrişî eynî wext de vera şarê kurdî de benî
Edemenî va ‘par ma zor û hêrişan ver netîceyo ke waşt nêgirewt’ û wina dewam kerd: “Her çiqas ke wina bî zî ma zere û teber de serkewtişanê girdan qezenç kerd. Ma musabeqaya sifteyîne de bi qedexeyê hetgiran vejîyayî saha. Xora musabeqaya sifteyîne de zî hetgiranê Amedsporî kewtî stadyum labelê dima ra hetê polîsan ra ameyî vetiş. Ti kes nêşeno nê heqê hetgiran bigîro. Bi zulm nêbeno.”
Edemenî bale ant hedefbîyayîşê Denîz Nakîyî ser û wina va: “Seba ke Amedspor beno hedef, Nakî raştê hêrişî ame. Eke îdarekarî qeraranê şaşan bigîrî, netîceyê şaşî vejîyenî. Ti kesî reyde problemê ma çin î. Ganî Wezîrîya Karê Zereyî vera hêrişan de hesas biba. Hêrişo ke vera Denîz Nakîyî de bîyo, vera Amedspor û vera kurdan de bîyo. No welat ma hemînan rê bes o. Ganî nê hedîseyî ra ders bivejî.”
Ma do taqîp bikerî
Edemenî va ‘ma derheqê hêrişî de ti kesî gerre nêkerd’ û wina domna: “Çimanê mîlyonan ver de teşebusê lînçkerdişî kerdî. Wexto ke hetgirî hêrişê Nakîyî kerd, pey ci de polîs yan zî wezîfedarê ewleyî çinêbî. No manîdar o. Sey ke Walî vano nîyo; Amedspor sîyaset nêkeno. Ez nê nizdîbîyayîşê Walîyî şermizar kena.”
AMED/ANF