Dewleta Tirk Cerablûs û Babî ra dima, nika zî xo kena amade ke hêrîşê Efrîn bikero. Sewqîyatê leşkerî yê ser sînorê Efrînî ra dima, çend rojîyo bi topan hêrîşê dewanê Efrîn kenê. Sermîyananê Tirkîya anê ziwan ke, iyê dê duştê herêma Efrîn wextekê nezdî de operasyon bidê destpêkerdiş. Yardimkarê Hemserokanê HDP Hişyar Ozsoy ke ser babed de qisey kerd, vist vîrî ke hêrîşê Efrîn, hêrîşê vera pêrokîn kurdan o.
Tirkîya do tawîz bido Sûrîye û Rûsya’
Ozsoyî ard ziwan ke heta ke rejîma Sûriye û Rûsya qebul nêkero, îhtîmalê operasyonî çin o. Hişyar Ozsoyî aşkere kerd ke ganî seba operasyonî bingeheke bibo û da zanayîş ke operasyonî de do Tirkîya tawîzeke senî bido rejîma Sûrîye û Rusya do rewş zelal bibo.”
‘Efrîn zey Cerablûs û Babî nîyo’
Ozsoyî îşaret kerd ke Tirkîya wazena bi no operasyonî seba Îdlîbî korîdoreke akero û wina dewam kerd: “Seba na têkilî xurt bikero, wazeno Efrîn bi temamî îzole bikerê. Tirkîya nêwazena kurdî bibê wayîrê heqî. Do tim tawîzan bidê û xo seba operasyonî hadre bikerê.”
Ozsoyî vist vîrî ke Efrîn zey Cerablûs û Babî nîyo da zanayîş ke na herêm de tenya kurdî ciwîyenê.
Ganî kurdî hêrîş vera xo bivînê
Yardimkarê Hemserokanê HDP Hişyar Ozsoyî da zanayîş ke muhtemela operasyoneke vera Efrîn do ser Reqa zî tesîr bikero û îhtîmal esto ke vera operasyoneke bi no rengî QSD tayî quwetanê xo bianco Efrîn û wina va: “Ganî pêrokîn kurdî hêrîşê vera Efrîn, hêrîşê vera xo bivînê û bi rihê xoverdayîşê Kobanê vera hêrîşanê ser Efrîn nêrazîbîyayîş damûsnê. Tirkîya nêwazena Kurd Rojhelatê Mîyanî de bibê quwetekê sereke. Do nê polîtîkayê Tirkîya yê vera Rojawa vinî bikerê. Ma omid kenê ke Tirkîya fikrê xo açarno.”
Hişyar Ozsoyî tewr peynî de da zanayîş ke kurdî do çormeyê Efrîn de bibê xelek û va, “Ya do Tirkîya bi kurdan ra haştîyeke virazo, yan zî do bikewo şerêko bênetîceyî mîyan. Ma omid kenê ke do tercîhekê şaş nêkero.”
DÎHABER/ANQARA