Hemserek û îdarekarê dezge û komeleyanê kurdan vera hêrişê dewleta Almanya de reaksîyon nîşan dayî. Hemserekê NAV-DEMî Tahîr Koçerî va ‘Gere şarê ma vera hêrişê dewleta Almanya de wayîrê komeleyanê xo bivejîyo’. KCDK-Eye zî îzehetêko nuştekî daye û dîyar kerde ke nê hêrişî bi talîmatê Erdoganî benî.
Polîsê Dewleta Almanya 2 rojî verê saetanê serê sibayî de eştî Komeleya Komelê Kurdê Demokratîke (DTKM) ya Bielefeldî ser û dest ronaybî xeylê çîyanê ewja ser.
Sereştişê komeleye ra dima xeylê îdarekar û endamê dezgeyanê sîvîlan ameyî têhet û hêrişê dewleta Almanya şermizar kerdî. Çalakgêran çalakîya rayîrşîyayîşî viraştî û çalakîye ra dima Hemserekê NAV-DEMî Ayten Kaplane û Tahîr Koçerî îzehet dayî çapemenîye.
Tahîr Koçerî va ‘Kurdî vera asîmîlasyonê kultur, huner, ziwan û tarîxê Kurdî de, dîasporaya Almanya de Komelî akerdê’ û wina domna: “Komelê ma semedê kultur, huner, ziwan û tarîxê Kurdan wezîfeyê dibistanan vînenê. Şarê ma gere vera hêrişê polîsê dewleta Almanya de wayîrê komeleyanê xo bivecîyo.”
Dim ara Ayten Kaplane qisey kerde û wina va: “Dewleta Almanya vera şarê Kurdî de dewleta Tirkîya reyde polîtîkaya şirîgî dana ramitene. Komeleyê kultur, huner, ziwan û tarîxî yê Kurdan benê qurbanê menfîetê dewletan. Şarê ma ena polîtîka qebul nêkeno û ma hêrişê polîsê Almanya şermezar kenê.”
Nê hêrişî talîmatê Tirkîya yî
Dîvanê Hemserokatîya KCDK-E zî vera hêrişê polîsanê Almanya de îzehetêko nuştekî da. Îzehetê KCDK-E de ca dîya xeylê babetanê muhîman û wina dewam kerd: “Ma vernî de hêrişê polîsanê Almanya yê vera komeleyanê kurdî de şermezar kenê. 24’ê Hezîrane ra nata hêrişê polîsê dewleta Almanya vera komeleyanê kurdan de zêdîyayo. Hêrişê dewleta Almanya bi polîtîkaya desthilatdarîya Tirkîya ra girêdaye ya.”
Ganî kurdî wayîrê komeleyanê xo bivejyî
KCDK-Eye dewamê îzehetê xo de bale anto şîrikîya dewleta Almanya û Tirkîya ser û wina qedênayo: “Gere Almanya polîtîkaya asîmîlîsyonê Tirkîya yê vera şarê Kurdî de baş bivîno û fek hêrişê komeleyanê kurdan ra veredo.” Dîvanê Hemserekîya KCDK-E veng da şarî û wina va: “Vera Desthilatdarîya şirîgîya Tirkîya û yê Almanya de gere şarê ma semedê yewîye, biratî û azadî wayîrê komeleyanê xo bivecîyo.”
MERKEZÊ XEBERAN