Hukmatê AKPyî nê rojanê peyênan de polîtîkayê zext û tedayan zaf xebetneno. Bi taybetî 15ê temuze ra nata heme hetanê komelî ser de hêrişî resayî duştê tewr berze. Tewr peynî zî çarçeweya Qerarnameyanê Hukmê Qanûnî de 390 sazî û dezgeyê sîvîlî hetê hukmatî ra ameyî morkerdiş.
Parlamentera HDPyî Saadet Becerîklîye derheqê polîtîkayanê AKPyî de qisey kerde.
HDP vera rejîmî de vındeno
Becerîklîye va neheqîyê ke welat de benî, nînî qebûlkerdiş û qiseykerdişê xo wina domnaye: “Şarê ma zî vîneno ke HDP partîyêka ke vera sîstemî de muxalefetêko gird kena ya. Ewro yê ke vera polîtîkayanê înan de vindeno û demokrasî û aştîye de israr keno zî reyna HDP yo. Tehemulê nêyî nêkenî; çimkî ê zî xeylê baş zanî ke wexto ke îdare demokratîke bibo, o wext heme şaşî û neheqîye vejîyenî orte û ê ke şaşî û neheqîye kenî zî yenî daraznayîş. Seba ke ê nînan baş zanî, teda û zextan zêdenenî. Nê semedî ra hêrsê şarê ma her ke şono zêde beno. Îqtîdar vano ‘ewro HDPyî rê eleqe çin o û ti kes beşdarê îzehetê çapemenîye daxî nêbeno.’ No manîpulekerdişê raştîyan o. Eke çîyo ke winasî esto, o wext qedexe wedarnê, ma bewnî şar yeno an nê?”
Qerarê xo antişî encax şar gêno
Becerîklîye dewamê qiseykerdişê xo de va derheqê xo meclîsî ra antişê HDPyî de dîyar kerde ke ‘nê qeraran ma tena bi kombîyayîşanê MYK û grûbî de nêeşkenî bigîrî û wina va: “No qerar, qerarêko giran o û encax şar eşkeno nê qerarî bigîro. Netîceyê nê kombîyayîşî de fikrêko winasî eşkeno bêro girewtiş. Mîyanê şarî de fikrê ‘Xo meclîs ra biancê û bêrê’ hîna zaf nêvejîyayo aver. Meclîs cayo ke ameyo qezenckerdiş o. Badê ke ma xo resna xeylê kes û hetan, encax o wext na rewşe zelal bena. O wext ma eşkenî reyna nîqaş bikerî.”
Xo bi xo xapênenî
Becerîklîye qiseykerdişê xo de bale ante şaredarîya Êlihî rê tayînkerdişê qayûmî ser û wina va: “Bi derbeya sîvîl ser îradeya şarî de îpotek ronayî û no şarî ra eleqe nêdî. Kes û hetê ke eleqe nawitî, kes û hetê ke heta nika îqtîdarî ra menfîetê înan estbî yî. Ti piştîdayîşê şarî çin o. Şaredarîye nika ya şarî nîya û bêxera viraştişê karê fermî, ti kes şaredarîye ra çîyêk nêwazeno. Xo bi xo xapênenî. Bi viraştişê park û bexçeyan wazenî şaredarîye qezenc bikerî. Kombîyayîşê taxan de vatişêk şarî esto ‘Keyeyanê ma altunî reyde virazo daxî, seba ma ti qîmetê ci çin o.’ Çimkî şar hema zî bawer keno ke şaredarîye ya şarî ya û heme çîyê ke yenî viraştiş zî projeyê şarî yî. Ganî nêyî baş fam bikerî.”
Becerîklîye peynîya qiseykerdişê xo de HDPîyan ser o zêdebîyayîşê zext û tedayan ard ziwan û qiseykerdişê xo wina qedêna: “No hem zerre û hem zî teber de Tirkîya dekeno mîyanê zehmetanê girdan. Tirkîya wazena Rojhelato Mîyanên de cepheyanê neweyan akera. Vera şarî de şerêko topyekun dayî destpêkerdiş, ganî heme muxalefet nêyî fam bikero. Her kesê ke wazenî nê şîyayîşî bidî vindarnayîş, ganî pîya hereket bikerî.”
OZGUR AYDIN / ANF / ÊLIH