Wexto ke Serekê MHP Dewlet Baxçelî aşkera kerd ke ê do desteg bidî sîstemê serekdewletî û waşt wa hînî semedê sîstemê serekdewletî qanûnî bêrê eştiş dima ra Serekwezîr Bînalî Yildirim vejîya meydanan û behsê sîstemê serekdewletî kerde. Tena Yildirimî ney, Serekkomar Erdogan zî sey her wextî verê xo da bajaro ke tede ameyo dinya Rîze û yew mîtîng viraşt. Erdoganî mîtîng de kerd eşkera ke sîstemê serekdewletî semedê Tirkîya şert o û eke sîstemê serekdewletî nêro Tirkîya peynîya înan hol nîya. Minaqeşeyê sîstemê serekdewletî newe nîyo. AKPya ke qayîla tena xo Tirkîya de bikera hukumdar rewnayo ke semedê nê sîstemî xebate kena. Xora teşebusê derbeya 15ê Temuze seba AKP bîyo yew xenîmet û firsend, no firsend kena hukumdarîya xo pê qanûnan bikera qewetin. AKPîyê mîyanê partî de ca gênê kindirê înan destê Erdoganî de yo. Hesabo ke ê ke no yo ke heta ke Erdogan hukmê welatî bikero ê zî ciwîyenê û benê wayîrê xêzî.
Xora na mesela de Serekê CHP Kiliçdaroglu sey merdimo poşman vano ‘berdelê çi beno wa bibo ma desteg nêdanê AKP’ Merdim vano qey o bi xo nêşîyo mîtîngê Yenîkapîyî û desteg nêdayo Serekkomar Erdoganî. Kiliçdarogluyo ke her mesela de piştgîrî dano AKP meselaya serekdewletî de xo peyser anceno. La ma nêzanê. Beno ke o zî do semedê sîstemê serekdewletî desteg bido Erdoganî. Xora MHP sey yew partîyêka cîya ney sey leyîrê Erdoganî sîyaset kena û semedo ke wa kurdî û çepgirî mebê xêz û heqanê xo nêgîrê her tewr desteg dana AKP. Ma zanê ke tena HDP Erdogan û tehtîdanê ey ra nêtersena û vana ‘ Ma do to nêkerê serkdewlet’ Xora semedo ke HDP nêverdaya wa Erdogan xeyalanê xo bîyaro ca hende bîya hedefê dewlete û her roj raştê zulme AKP yena.
Nika Erdogan keno ke meseleya serekdewletî bierzo rojdem û hukumdarîya xo pê qanûnan zixm bikero. Aye ra rejîmê OHALî semedê ey yew firsend o û keno ke bin a zordarîye hetanî çend aşman weçînayîş bikero û no firsendê kaosî de sîstemê serekdewletî bîyaro Tirkîya. Xora Erdoganî her gureyê xo mîyanê temîyanbîyayîşî de ardo ca. Ma pêro zanê ke mezgê Erdoganî de meseleya esasî serekdewletbîyayîşê ey o. Ne FETO ne DAIŞ ne safîkerdişê meseleya kurd ne zî ekonomi xemê ey de yê. Mezgê ey de mehzebê muslumantî sunnîtî ser o yew tewirê îdarekerdişî esto û wazeno sey padîşahanê verênen xo rê seltanatêk rono. Xo bi xo vano ‘eke mi seltananê xo rona û Tirkîya de sîstemêko otorîter awan kerd ez eşkena verê eskerîye bidî her cayê rojhilatê mîyanênî û her ca de şer vejî.’ Çimkî ma baş zanê ke çimê ey Iraq, Sûrîye Yemen û Misir de yo. Tena welatê ey bes nêkeno û wazeno sey siltananê Osmanîyan pê îşxalkerdişê erdanê dewletanê xerîban her çî îdare bikero. Xora ma baş zanê ke Sûîye ra heanî Misir welatanê Rojhilatê Mîyanênî de tewr zêde rîyê polîtîkayanê Erdoganî ra têmîyanbîyayîş esto.
Yanî Tirkîya û Rojhilatê Mîyanên de çiqas demokrasîya kême hende îqtîdarbîyayîşê erdoganî. Qaso kem a şahîdê ci benê hesabê Erdoganî wina yo. Erdoganî wexto ke bi zîhnîyetê xo Tirkîya de rejîmî bedilna kamo ke vera ey de astengî vetêne ey tasfiye kerd. Xora ma baş zanê ke hevalê ey ê verênan ra kes nêmend. Keyfê ey biwazo serekwezîr yan zî wezîrê karanê sereyi wezîfe ra gêno û herinda înan de yew îtatkarêkê xo tayîn keno. Wezîr û parlementerî bi fermanê ey hereket kenê û Tirkîya de meclis ney, Seraya Beştepe wayîrê hukmî ya. Xora nika bi hewayêko pratik Tirkîya pê sîstemê serkekdewletî îdare bena. Îdarekarîya ke xeyalê Erdoganî xemilnayêne nika falîyet de ya. AKP kena ke hetanî çend aşman weçînayîş bikero. Xora bi îlanbîyayîşê OHALî sîstemê dizdî û heramwerî ristim eşto her ca. Kenê ke weçînayîş de zî sîstemê dizdî û heramwerî bikerê ebedî. Tabî nê çîyî ke mi behsê ci kerdî zafê xo xeyal û programê Erdoganî yê. Yanî ma eşkenê ci rê vaje hesabê serdestan zî. La her tim yew hesabê bindestan zî esto.