Heskîfo ke tarîxê ci 12 hezar serran kehen o de do 10ê Hezîrane de dest bi girewtişê vernîya awe bêro kerdene û bi no qeyde qezaya tarîxî do binê awe de bimano. Tevgerê Dayîşê Cuyayîşê Heskîfî bi nameyê ‘Seba xelisnayîşê Heskîf û Newala Dîcle erey nîyo’ vengdayîşêk kerd û 87 dezgehan nê metnî îmze kerdî.
Vengdayîş de bale ancîyayo muhîmîya tarîxî û kulturî ya Heskîfî ser û wina ameyo vatene: “Eke no baraj bikewo fealîyet do mîrasê kulturî binê awe de bimano. Bi des hezaran merdimî ver bi feqîrîye şêrî. Reyna Newala Dîcle ke wayîrê dewlemendîyêka girde ya zî çin bibo.”
Dewamê metnê vengdayîşî de ameyo vatene ke Heskîf qasê Kapadokya, Efes û Truva de wayîrê muhîmîyêk o’ û wina dewam kerdo: “Heskîf 10 krîteranê UNESCO ra 9ê ci mîyanê xo de hewêneno. Heskîf cêwîya Gobekli Tepe yo. Herinda ke hukmat seba girîyayîşê Lîsteya Mîrasê Dinya hewl bido, ewja de baraj virazeno. No proje projeyê talan û rijnayîşî yo. Ma veng danî hukmatî ke wa nê projeyê vindarno. Ganî şarê herême reyde dîyalogî bêrî kerdene û goreyê ci hereket bikerî. Ma veng danî herkesî ke wa destek bidî nê vengdayîşê ma.”
JINNEWS / AMED