50 sîyasetmedaranê kurd bi waştena ‘wa bi Rayverê Şarê Kurd Abdullah Ocalanî pêdiyayiş virazîyo’ 5ê Îlone de destpa nûmayişî kerdî. Nûmayişo ke pêrokîn dinya de veng da raştê zîyaretê welatijan û sîyasetmedaran yeno. Parlementerê HDP Dîlek Ocalan, Selma Irmak û Ferhat Encu ke derheqê emelê nûmayişî de qisey kerdî ardî ziwan ke eleqeyê şarî seba înan quwetê moralî yo. Parlementer Dîlek Ocalan vist vîrî ke armancê grevê veyşanî qedînayişê bêhiqûqîya Îmrali û Ocalanî ra hayderî girotiş o. Ocalan da zonayen ke 15ê Temmuze ra dima şik û gumanê înan û yê şarê kurd gird bî.
‘Heta peynî ramenime’
Parlementera Riha vist vîrî ke demekê quwetîn de nûmayişeke quwetîn virazenê û wina dewam kerd: “Wayîrvejyayişê şarî seba ma çimeyê moralî yo. Nûmayişê vengvetişî yê şarê Amedî ke seba poştdayişê nûmayişê ma virazenê zaf erja yo û sîmgeyê israrê çarekerdişî yo.” Dîlek Ocalan seba ameyişê haştî û çarekerdişî hayr ant Îmrali ser û va, ‘Ma seba çarekerdişî nûmayişan ramenê, la eke kişta hemverê ma ra gameke seba çarenêkerdişî bîro do mesele zehmet bo. Ocalan vist vîrî ke seba haştî û çarekerdişê mesele cepheyê şarê kurdî ra çend reynî vengdayişî amey dayen û aşkere kerd ke la nê vengdayişî hetê vînayiş û fikrê jew kesî amey redkerden. Ocalan peynî de aşkere kerd ke eke şar çiyekê wazeno se do ey bigîro û va, ma dê zî heta peynî xoverdayişê xo bidomnê.
‘Ganî AKP ser de zext bîro kerdin’
Parlementerê HDP yê Şirnex Ferhat Encu ke çehar rojîyo grevê veyşanî de ca gêno zî vist vîrî ke dewlet polîtîkayê mijûlkerdişî ramena û aşkere kerd ke heta ke heyetekê sîyasî nêşiro Îmrali û bi Ocalanî ra pêdiyayiş nêvirazo iyê dê tetmîn nêbê. Encu da zonayen ke iyê dê grevê veyşanî ra fek vera nêdê û wina va: “Nûmayişê ma heta ke bireso emelê xo do dewam bikero. Nûmayişê ma ser waştena rewa hu hiqûqî yo. Seba ke na waştena ma bîro ca û pêdiyayişî virazîyê, ganî nûmayişî destpa bikerê û ser hikûmeta AKP de zext bîro kerdin. Encu aşkere kerd ke ganî şar tewrê nûmayişan bibo û tekoşînê xo berz bikero.
‘Têna Ocalan eşkeno vernîya kaosî bicêro’
Nûmayişkaran ra Selma Irmak zî vist vîrî ke Ocalan Rayverê şarê Kurd o, bi mîlyonan temsîl keno û wina va: “Ma zey vengê şarî kewtî na çalakî û heta destfînayîşê waştenanê xo zî ma tekoşîn kene.” Irmak biyayîşê ke 5ê Nîsan 2015 ra nat biyê ser zî vindert û va; ‘çend kesî qetil bî, çend bajarî ser û bin bî. Dişmeniyê hukumetê AKP ra Tirkiye zî kerde vîn. Êr nê meclîs nê zî artêş esta. Tirkîye no kaos ra têna Brêz Ocalan eşkeno biveco.’ n
DÎHA/AMED
Strasbûrg de roja 17.
Sûka Fransa Strasbûrg de zî Azayê Meclîsa Şengal yê Diyasporayî serva serbestiya Ocalanî greva veyşanî de rê. Çalakiya greva veyşanî yê bêwaxt û bê açarnayen roza 17. de ra.
Parlamentera HDP Feleknas Uca û Hemserokê Nav-Dem Bahattîn Dogan şî ziyaretê çalakvanan. Feleknas Uca da zonayene ke çalakiya Strasbourg çalakiya de tarixiya û Kurdistanizan rê vengdayisê wayir vejiyayene kerd. Heyeta doxtoranê şîndor nasnêkene şî diyarê çalakvanan. Hetê bîn ra kome ke dor bi dor tewrê çalakî benê ramene. Azayanê TJK Ewrûpa çalakî dewr guretî. Namê TJK E Axîn Gulo qeseykerd û da zonayene ke heta ke Rayverê xo ra hayderî bicêrê dê lingan sero bê. Çalekîya greva veyşanî yê ceniyan do 7 rozan biramo.
STRASBÛRG
Endulus de Manîfestoyê Ocalanî ame dasilasnayiş
Kitabê Rayverê Şarê Kurd Abdullah Ocalan'î manîfestoyê şaristanînê demokratîk açariyayê ziwanê Îspanî û Katalankî. Badê kitabê Ocalan'î Îspanya de çap bi, bi kombiyayişan yeno dasilasnayen.
Nê kombîyayişan ra yew zî sûka Cadiz ê eyaleta Andulus de viraziya. Açarnayoxê kitabî Mahmut Çolak, dostê şarê kurdî, akademîsyen, temsîlkarê partiyanê siyasî û xeylê saziyan tewrê kombiyayişî bî. Mahmut Çolak'î kombiyayîşî de qalê xebatê açarnayinê kitabî ê 5 serran kerd û vat: “Ocalan'î bi enê kitabê xo raya qedînayişê lejê etnîkî mûsnayo. Eno zî teniya seweta kurdan niyo, seweta pêrin şaranê Rojhelatê Mîyanî yo. Kombiyayişê seba dasilasnayişê kitabanê Ocalan"î dê sûkanê Granada û Malaga de dewam bikirê.
ANF/MADRÎD