Bi nameyê Abdûlazîz Acir û Fethî Şahînî de 2 çalakgêrî 45 rojî yo ke her roje beşdarê çalakîya Nobeta Demokrasî benî û xespbîyayîşê şaredarîyan şermizar kenî. Çalakgêran bale ante bêvengîye ser û wina va: “Ma heta çi wext bêveng bimanê? Heta ke ma bêveng bimanê, ê do hêrişê ma bikerê. Ganî ma vera zulmî de sêneyê xo bikerê mertal.”

DENÎZ ÎKE / ANF / AMED

19ê Tebaxe de îqtîdarê AKP û MHPyî şaredarîyê bajarê girdî yê Amed, Wan û Mêrdînî xesp kerdî û herinda hemşaredaranê HDPyî de qayûmî tayîn kerdî. Roja ke şaredarîyî ameyî xespkerdene û qayûmî ameyî tayînkerdene ra nata çalakîyê protestoyî dewam kenî.

Bitaybetî Amed, Wan û Mêrdîn de çalakîyê Nobeta Demokrasî yenî tepiştene û her roje bi seyan merdimî beşdarê çalakîyan benî. Çalakîya Nobeta Demokrasî ya Amedî roja 45. de bêmabên dewam kena. 7 serrî ra heta 70 serrî xeylê kesî çalakîya ke Cadeyê Lîse yê Yenîşehîrî de virazîyena benî.

Abdûlazîz Acir û Fethî Şahîn her di embazê ke 9 serre verê cû Nimajê Îne yê Sivîlî de yewbînan şinasnayo û bîyî embaz. Acir û Şahîn aye roje ra nata zî tim pîya şinê çalakîyan. Her di zî roja 45. ya çalakîya vera qayûman de cayê xo girewt. Aciro ke dewa Hetbî ya qezaya Dêrikî ya Mêrdînî ra yo, serra 1938 de ameyo dinya û serra 1989 de problemanê ekonomîkan ver mecbur mendo ke koçê Amedî bikero. Acirî Mêrdîn û Amed de 45 serrî şîwanîye kerda û 28 serrî ra nata tevgerê sîyasetê Kurdan de ca gêno. Acir nê rojan de zî vera qayûman de seba îradeya şarê xo têkoşin dano.

Qayûmî dizdî û munafiqî ya

Acirî dîyar kerd ke seba ke tewrê çalakîye bîyo bextewar o û wina dewam kerd: “Şerêkê vera îrade û heqanê Kurdan de esto. Kura de zulm esto ma uca de heqê xo gêrenî. Hêzo ke vera nê lejan de vindero hêzê Kurdan o. Ma weçînayîşê 31ê Adare de qayûman tîya ra pak kerdî. Êyê ke ma pê îradeya xo weçînayê, ameyî. Ma 45 rojî ra nata vera xespkerişê îradeya ma de ma xover danê. Hînî ma dewlete ra bawer nêkenê. Quran de vano ke ‘eke cayêk de zulm bibo, uca de xoverdayîş zî do estbo’. Ez heta peynîya cuya xo seba heq û edaletî têkoşîn dana. Ma heqdar ê û ma do ser bikewê. Qayûmî dizdî û munafiqî ya.”

Ma bêalternatîf nîyê, bihêz ê

Acir ê kesan ra yo ke reya verêne tewrê Nimajê Îne yê Sivîlî bîyo. Acirî na babete de wina va: “Ez vera camîyan de nîya la ez nêşina camîyanê dewlete ke tede îdeolojîyê xo bi zorî ma ser o ferz kena. Taxa ma de îmamê ma esto û ma şinê camîyê xo. Ez qet peyê îmamê sîstemî de nimaj nêkena. Camîyan de Kurdan rê heqaret kenê, seba Erdogan û Ataturkî duayan kenê. Çira ez seba kiştoxanê şarê ma dua bikera? Erdogan tim zûran keno, Kurdan rê heqaret keno, munafiqîye keno. O dînê ma seba karê xo xebitneno. Bi nê têgêrayîşanê xo kifş o ke vera dînê ma de yo. Ma bêalternatîf nîyê. Ma bihêz ê. Ganî Kurdî wayîrê heqanê xo bivejyî. Eke ma ameyoxê domananê xo xo rê derd kenê ganî ma vengê xo vejê.”

Ma heta çi wext bêveng bimanê?

Fethî Şahîn zî dewa Dêlgurî ya qezaya Çinarî ya Amedî de ameyo dinya û 12 serrî verê cû koçê Amedî kerdo. Şahînî karê heywankarîye û zîretî keno û debara keyeyê xo bi şîwanîye keno. Badê ke lajê datê Şahînî hetê Hîzbullahî ra ameyo qetilkerdene, keyeyê xo bar kerdo Sûrê Amedî. Şahînî derheqê xespê qayûman de wina va: “Înan dest naye îradeyê şarî ser. Ma heta çi wext bêveng bimanê? Ma heqanê xo gêrênê. Qayûm ruşwet û dizdî yo. Heta peynîya cuya xo ez do wayîrê îradeya şarê xo bivejîya. Wexto ke qayûm ame tayînkerdene ez û Abdûlazîz ma ameyî tîya. Polîsan hêrişê ma kerd. Ma înan ra nêtersenê. Her roje ma Cedeyê Lîseyî de yenî têhet. Heta ke ma bêveng bimanê, ê do hêrişê ma bikerê. Ganî ma vera zulmî de sêneyê xo bikerê mertal.”