Qazî Mihemedo ke 71 serrî verê Raşteyê Çarçira de ame îdamkerdiş, pey xo de 2 wesyetî verdayî. Qazî Mihemedî wesyetê xo de qala muhîmîya yewîya neteweyî kerdbî û ewro sere de Efrîn û sewbîna temamê Kurdistanî de lazimîya tewr gird yewîya neteweyî ya. SADÎYE ESER /  MA/ STENBOL Ewro serrgêra 71. ya îdambîyayîşê Qazî Mihemedo ke awankarê Komara Kurdî ya Mehabadî yo û rayberanê kurdan ra yewe yo. Qazî Mihemed 31ê Adara 1947î de Raşteyê Çarçira de ame îdamkerdiş. Qazî Mihemedî sey rayberanê bînan yê kurdan wesyetê xo de qala yewîya neteweyî ya kurdan kerd. Qazî Mihemedî 11ê Sibata 1946î de Meclîsê Millî yê Kurdistanî de kombîyayîşo sifteyîn viraşt û eynî roje ziwanê Kurdî kerd ziwanê fermî yê dewlete û marşê ‘Ey Reqîb’î zî kerd merşê Kurdistanî. Qazî Mihemed hetê 30 endamanê Meclîsî ra sey Serrekkomarî ame weçînayîş û aye roje qiseykerdişêko wina kerd: “Ez ser pîlîya Homayî, pîrozîya Qurenê Kerîmî, beyraqe û welatê xo sond wena ke ez do heta peynîya dalpeya gonîya xo, bi can, mal û hilmê xo yo peyên seba welatê xo bixebetîya.” Meclîs awanbîyayîşê Komare ra dima dest bi xebatan keno û hetê perwerdeyî de gamanê muhîman erzeno. Kovara Kurdistanî dest bi weşanî kena û qerar dîyeno ke yew rojnameyo fermî bêro weşênayîş. Dima ra kitabê şîîre yê 2 şaîran yenî çapkerdiş. Reyna Radyoya Mehabadî dest bi weşanî kena. Seba vernîgirewtişê qetlîyamî teslîm bi  9ê Gulane de Sovyetî erdanê Îranî ra ancîyayî û Îran dest bi dagîrkerîye kerd. Netîceyê na dagîrkerîye de Azerbaycan 16ê Teşrîna peyêne de teslîm bi. Badê ke Sovyetan sozê xo yê dayîşê sîlehan nêard ca, Komara Mehabadî heme tewir rayîrê xoverdayîşî ceribna. Labelê Qazî Mihemed seba ke şar nêro qetilkerdiş, dişmenî reyde pê kerd. Dima ra 17ê Kanûne de dewleta Îranî Komara Mehabadî rijna. Qazî Mihemed, Serekwezîr Haci Baba Şêx û Wezîrê Pawitişî Muhammed Huseyîn Xan Seyfî Qadi ameyî tewqîfkerdiş. Qazî Mihemedî mehkeme de wina va: “Herinda ke şima bêrî tewqîfkerdiş û mehkeme bibî, şima yenî keyeyê ma de, welatê ma de ma tepişeni û hepis kenî. Nê sey kerdişanê dagîrkeranê bînan î. Eke dewlete kurdan sey xayînî vînena, o wext veradê, wa kurdî bi xo xo îdare bikerî.” Dima ra Serekkomar Qazî Mihemed, Serekwezîr Haci Baba Şêx û Wezîrê Pawitişî Muhammed Huseyîn Xan Seyfî Qadi 31ê Adara 1974î de ameyî îdamkerdiş. Qazî Mihemed îdamî ra ver seba keyeyê xo û şarê xo 2 wesyetî verdayî. Îdambîyayîşê Qazî Mihemedî ser ro 71 serrî derbaz bîyî, labelê lazimîya yewîya neteweyî ke wesyetê Qazî Mihemedî de yeno ziwan, ewro zî xo nîşan dana. Bitaybetî Xoverdayîşê Kobanê de na lazimîye vejîyaye orte û reyna ewro vera hêriş û dagîrkerîya ke Efrîn ser o yenî ramitiş de zî lazimîya yewîya neteweyî xo ferz kena. Eke şima bibî yewe, şima rizgar benî Qazî Mihemed wesyetê xo de veng dano kurdan û wina vano: “Ey Milletê Kurdî. Birayê min ê erjîyayeyî. Yewbînan rê dişmenî mekerê û vera dişmen û zaliman de bivinderî. Xo meroşê dişmenan. Dişmenê kurdan zaf î. Eke yew şar yewîya xo awan nêkero, o şar hertim raştê zulm û tedaya dişmenanê xo yeno. Birayê mi êdî meyrê kayanê dişmenanê xo. Heta nika dişmenan Îsmaîl Axa (Simko), birayê ci Cewher Axa, Hamza Axayo Mengurij û zafînan bi sondwerdişî xapênayî. Înan bawerîya xo bi sondê dişmenî ardî. Ez sey birayê şima, şima ra vana eke acemî hingimên da şima, bizanê ke tede jehr esto. Wesyetê mi o yo ke domananê xo bidê wendiş. Çimkî wendiş sîleho tewr gird o. Wa kişîyayîşê ma şima nêtersno. Heta ke şima nêbî yewe, şima sernêkewenî. Zulmê yewbînan mekerê. Wa Homa hetkarîya şima bikero.”