Nêzdîyê yew serra ke no şer domyeno û berdelê no şerî her roj cîya cîya hetan de bandorê xo nîşan dano.
Bandroêkî bîn zî hetê ekonomî de yo. 3 aşmê sifteyîn ê na serre de vejya werte ke Butçeya Malî 7 qatî vêşî bîyo û resaya 297 mîlyon 746 TLyî. Butçeya ewleyî û pawitişî zî 11 mîlyar TL vêşî bîya û resaya 62 mîlyar TLyî.
Babete ser o ekonomînîst Mustafa Sonmez vînayîşê xo ard ziwan.
Sermeyagozarê bîyanî
Sonmez ciresna ke tîya de aktorê sereke sermayegozarê bîyanîyan î û wina verdewam kerd: “Aşma sibate û adare de semedo ke sermayegozarê bîyanî ameyî dolar ercan bi la aşma nîsane de sermayegozarî rayna şî û ger ke wina şêro dolar rayna bireso 3 TLyî. Rayna zî ê ke AKP teng bikero teberê ekonomî de sîyaset û tedaye teberî yî. Qesra Qeçax wesayîto ke hetê çepî de aver şona ra manena û paştîya aye de sucê muhîmî estî. No semedî ra nêşkena bivindera, ger ke bivindera do bikewa. Coka pergala serekîye de hende israr kena.”
Sonmez dergeyîya qalîkerdişê xo de ard ziwan ke AKP seba ke weçînayîşê 2015 de tena serê xo nêşîna biba îqtîdar û no semedî ra şer da destpêkerdiş û wina verdewam kerd: “Badê zî hem Rjawan de û hem zî Kurdistano Vakur de dijî kurdan şer da destpêkerdiş. Hedefê no hêriş û şeran tercîhê rayan heta aşma teşrîne bedilnayîş bi. No hetî de tay serkewtî zî û bi no hawa rayna bîyî îqtîdar. Wexto ke dîyî no raybaz serkeweno aşma teşrîne ra dima şerî dayî verdewamkerdiş. Hedefê înan linga meclîsî yê tevgerê kurdan werte ra wedarno û bi no hawa bireso Serekîye. Demo ameyox de îxtîmal esto ke bertekê dijî AKPe vêşî bibî û AKP têk şîra.”