Dûştê sîyaseta rehîn girewtişî hemşaredaranê qezaya Amed bi damûstayîna çapemenî nêrazîbîyen damûsna û hikûmet aya kerd.
Hikûmeta AKP 35 şaredarîyê DBP bi tayînkerdişê qeyûman xesp kerd. Herzewbîn 46 hemşaredarê DBP rehîn amey giroten. Amed de zî xeylê şaredariyê DBP bi talîmatê Erdoganî îşgal bî. Amed de hemşaredarê Bismîl, Baglar, Çinar, Pîran, Erxenî, Gêl,Hezro, Karaz, Kayapinar, Pasûr, Licê û Yenîşehîrî ver bana şaredariyê Kayapinar de eşkerakerdiş day çapamenî. Polîsan verîya eşkerakerdişî şaredarî bi wesayîtanê zirxî girot bin abluqa.
‘Vera îradeyê şarî yo’
12 hemşaredarê Amed ke hetê şarî ra weçîniyay û hetê AKP wezîfe ra girewtinîyay rexmê astengîyanê polîsan vila nêbî. Ser nameyê hemşaredaran hemşaredarê Kayapinar Mehmet Alî Aydinî eşkerakerdiş wend û kerdenanê AKP sey ‘yew lekeyo sîya’ hesibna. Aydinî vist vîrî ke sîyasetmedarê ke bi îradeyê mîlyonan weçînîyay hedefê hêrişanê AKP de yê û va ‘No hêriş vera îradeyê şarî yo.’
Mehmet Alî Aydinî da zonayen ke şaredarîye ke qeyûm erzîya ci çarnîyayê qereqolî û va, demokrasî binate ra wedarîyaya. Aydinî aşkere kerd ke şar do na bêhiqûqîyê ra bêveng nêmano û dîyar kerd ke Tirkîye de biyayîşê ke benê serranê 90yî viyertî û qiseyanê xo bi nê vatişan qedêna: “Rexmê pêrokîn hêrîşan ma qerarînê ke heta serkewtişî tekoşîn bikerê. Hemşaredaran veng da hikumetî û semedê rindîya peroyê hetan waşt ke OHAL wedarîyo û demê çarekerdişî rê peyser ageyrîyeyo.
DÎHABER / AMED