Peynîya erdlerzê Xarpêtî de 41 kes cuya xo dayê û 1607 kes zî birîndar kewtê. Nika bajar de tay mintiqayan de çadirî ameyê ronayiş. Parka Kulturî de zî çadir ronîyayê. Hetkarîyê ke şaredarîyê HDPî kom kerdî, kewtişê nê hetkarîyan bajar rê polîsê AKPî destûr nêdayê.
Welatijê Xarpêtî kêmanîyan rê gerraker ê. Çadiran de taybetî Riha, Dîlok û Çewlîgî ra kesî ke ameyê rê ca ameyo dayiş. Peynî erdlerzî humara kesî ke bi erebî qise kenê zêdîyayê. Nê kesî zî hetkarîyêkê gênê bi pere roşenê. Taybetî çadiran de persgirêkê minder, sobe û battaniye estê.
Welatij Arzu Arslan vat ke hetkarîyan bi sîstemî vila nêkenê, taxa Sursurî de yew kesî rê çadir nêameyo dayiş û wina vat: “Muxtir rê zî gerraker o, ez şinasnena, yew kes 3 çadir girewto berdo keyeyê xo. Programê televîzyonî de 51 trîlyon pere seba Xarpêt kom bî la şima bawer kenê nê pereyi biresê ma rê.”
Ayşe Karlitepe zî vat ke a seba ke bertek mojnaya no ser sey provokator ameya nîşan dayiş û wina vat: “Demê erdlerzî keyeyê ma sey beşikî elîqya, ma xo bi zorî xelisna. Ma hema zî benda çadirî yê, qet şerm nêkenê. Demo ke min roportaj de raştin vat, min zey prokotor mojnayî. Esil wayîrê îxtîyacî rê hetkarî nêdanê.”
JINNEWS/XARPÊT