Navenda Çapemeniyê diyar kir ku êrîşên çeteyên DAIŞ‘ê yên bi armanca dagirkirina Kobanê di 15’ê Îlonê de hatin destpêkirin, dewam dikin. Hat ragihandin ku komên çete ji herêmên Cerablûs, Girê Spî, (Tel Abyad) Reqqa û gelek deverên din hêzên nû dişînin û hewl didin êrîşên xwe dijwar bikin.
Di daxuyaniyê de hat gotin, “Hêzên me û hêzên Burkan El Firat ên parastina Kobanê bi hev re ne, li hin deveran çalakiyên dijber li hemberî çeteyan pêk anîn. Komên çete ku êrîşên wan hat şikandin navend û deriyê sînor bombebaran dikin.”
Navenda Çapemeniyê ya YPG’ê da zanîn ku li du deverên eniya rojhilat, duh danê nîvro şer destpê kiriye, tevahiya şevê dewam kiriye û got, “Li herêma Kaniya Kurdan ku li bakurê eniya Rojhilat e, çeteyan êrîş kirin, hewl dan deverên ku hatine rizgarkirin dîsa dagir bikin, lê belê êrîşên wan hatin têk birin. Li rojhilatê bajêr jî çeteyan hewl dan ji du milan ve êrîşî derdora avahiya Şaredariyê bikin. Ev êrîşên çeteyan jî hatine têk birin û neçar mane vekişin kozikên xwe.”
Di daxuyaniyê de hat ragihandin ku komên çete li eniya başûrrojhilat li derdora Miştenûrê jî şevê din li pey hev êrîş pêk anîn û ev êrîşên çeteyan ji aliyê hêzên YPG/YPJ’ê hatine têkbirin.
18 endamên DAIŞ’ê hatin kuştin
Hat diyarkirin ku li eniya başûr jî komên çete derbên mezin xwarin û hêza wan ê êrîşî hatiye têk birin. Navendê destnîşan kir ku ji ber vê sedemê komên çete şevê din bi çekên giran û topan çeperên hêzên YPGê û navenda bajêr topbaran kirine.
Di dewama daxuyaniyê de ev agahî hatin dayîn:
“Duh piştî nîvro li derdora gundê Mala Mustafayê Musa ya ku li rojavayê Kobanê ye, di navbera hêzên me û çeteyên DAIŞ‘ê de pevçûnek hat jiyîn. Dîsa li mezraya Arbuş ku dikeve rojavayê Kobanê jî hêzên me li dijî çeteyan çalakiyek pêk anîn. Piştî van pevçunan çeteyan ji van deveran reviyan. Li herêma di navbera gundê Menazê yê li başûrrojavayê bajêr û navenda bajêr jî wesayitek tevî çeteyên di nav de hat rûxandin. Bi qasî ku hatiye tespît kirin di şer û çalakiyên 24 saetên dawî de herî kêm 18 çete hatin kuştin. 3 hevalên me ku ji destpêkê heta niha di nava berxwedana Kobanê de bûn û bi ruhekî fedaî şer kirin şehîd bûn.”
KOBANÊ
4 çete hatin kuştin
Navenda Çapemeniyê ya YPG'ê da xuyakirin ku di operasyona li Serêkaniyê de, duh bi şev herî kêm 4 çete hatine kuştin. Navenda Çapemeniyê ya YPG'ê bi daxuyaniyekê ragihand ku operasyona li rojava û başûrrojavayê Serêkaniyê dewam dike. Di daxuyaniyê de hat gotin, "Hêzên me li ser xeta sînor koma çete kirine kemînê û çalakî pêk anîn. Di heman wextê de çeperên çeteyan bi doçkayan hatine hedef girtin. Li Rawiya û derdorê jî çeperên çeteyan hatine hedef girtin. Di van çalakiyan de qasî ku şervanên me tespît kirine herî kêm 4 çete hatine kuştin."
SERÊKANIYÊ