Verîya reydayişî ser nameyê HDP Serokwekîlê Koma HDP Îdrîs Balûken’î qisey kerd û hewldayenê hewadayişê (wedarnayiş) heqê destnêdayişî, zey darbeya Erdogan’î ya dûştê meclîsî hesibna û aşkere kerd ke îye dê dûştê darbe milê xo çewt nêkerê.
Badê HDP, CHP hedef de yo
Balûken’î ard ziwan ke, rîwalo ke HDP dûştê dîktatorînê Erdogan’î vindîya bî hedef û da zonayen ke zihnîyeto ke, nika Kurdistan de qirkerdişî virazeno, wazeno HDP zî tesfiye bikero. Serokwekîlê Koma HDP Îdrîs Balûken’î vera darbeya AKP veng da CHP û waşt ke, mebo pîyakarê sûcanê Balûken’î vist vîrî ke Erdogan û AKP HDP kerdo hedef û aşkere kerd ke badê HDP, hedefê Erdogan’î de CHP esto.
Balûken'î hayr ant Darbeya 2ê Adar’î ya vera parlamenteranê DEP ser û vat: “Tarixî wekîlanê DEP nê, kesê ke wekîlanê DEP eştî zîndanan, eştî bîdonê çopî yê tarîxî.” Badê Baluken'î temsîlkaranê AKP, CHP û MHP zî heqê qiseykerdişî girotî û pêrokînan zî waştî ke serva heqê destnêdayişî wedarîyo rey bidê.
Reydayişê ‘demokrasî ya zî darbe’
Badê qiseyan tûra sifteyîn yê reydayişî dest kerd ci. Madeyê sifteyîn de, 350 reyê "e" (qebûl) û 148 reyê "nê", 5 reyê bêhet û 27 reyê nêhesibiyayî vejîyayî. Madeyê dîyin de zî 357 reyê "e" û 149 reyê "nê" vejîyayî. Her çendî hewce bi raydayin nimite bidîyayî zî, la belê heveyê wekîlanê AKP bi mûsnayişî reyê xo day. Tûra dîyin ê reydayişî roja Îne virazîyena.
Her 2 madeyan û pêrokîn teklîfî (waşten) ser o, 3 finî reydayen do virazîyo. Eke reyê "e" binê 330 de bimanê, teklîf do red bibo, eke mabenê 330 û 367 de bimano serva (qandê) pêşkeşê referandûmî bibo, rişiyeno Reîscûmhûrî rê û eke reyê “e” vêşîyê 367 de vejîyê zî, teklîf do qebûl bibo.
NAVENDÊ XEBERAN