BARIŞ BALSEÇER / BEDRAN DENÎZ / ANF / STRASBOURG
Nobeda ‘Ocalanî rê azadî’ ke 25ê Hezîrana 2012î de bajarê Strasbourgî yê Fransa de dest pêkerde, çalakîya tewr demderge ya bêmabên a Kurdan a. Wayîrê fikrê na çalakîye Essa Moosa yo ke Afrîkaya Başûre de pîya bi Nelson Mandelayî vera rejîmê Apartheîdî yê nîjadperestî de têkoşîn dayene yo.
Her hewte grûbêka newî welatêkê cîyayî yê Ewropa de nobete gêna û pîya bi serd, germ û varanî her roje waştişê azadîya Ocalanî anê ziwan. Pîya bi temsîlkaranê sazîyanê Kurdan ê Ewropa heman wextî de mengêk ra reyêk zî temsîlkarê leteyanê Tevgerê Cinîyanê Kurdan ê Ewropa (TJK-E) benê nobedar.
Amadekaranê çalakîye ra Mûnzûr Emekçîyo ke bi serran tewrê aktîvîte bi, serra 2016 de cuya xo vînî kerdbî. Emekçîyî 30ê Adara 2015î de vatbi “Bi nameyê Komîteya amadekare ma do heta azadîya Birêz Ocalanî çalakîya xo bidomnê.”
Domanê ma do bi sereberz bibê
Keso bi nameyê Zulfu Bîngol serre û nîm o zereyê Komîteya Çalakîye de yo. Bîngolî vist vîrî ke înan heşt serrî xo ra dima verdayê û heta azadîya Ocalanî do çalakîya xo bidomnê. Bîngolî va ‘ma bi na çalakîye ameyoxa xo nusenê’ û wina domna: “Demo ke domanê ma, torinê ma rojêk bi na çalakîye pê bihesîyê, do bi têkoşînê ma yê çar parçeyanê Kurdistanî û her cayê dinya sereberz bibê.”
Şarê ma bi îrade vera hêrişan de vindet
Avûkatanê verênan ê Ocalanî ra Mahmût Şakar zî çalakîya Ocalanî şopneno. Şakar serrgêra vîstine ya komploya mîyanneteweyîye ya vera Ocalanî de bale ante sere muhîmîya çalakîya ‘Nobeda Ocalanî rê azadîye’ û wina va: “Vera komplo de heme perçeyanê Kurdistanî de û diaspora de xoverdayîşêko destanî, demderg, bêmabên û biisrar ame kerdene. Şarê ma bi îrade û qerardarîyêka pîle vera hêrişêkê pîlî de vindet.”