KURTAY SERHAT ANF / BEHDÎNAN
Fermandarîya Warê Zagrosan ya HPGyî ke 8ê Hezîrana 2017î de bi nameyê Hemleya Şehîd Bedran Gundikremo û Şehîd Nalîn Mûşe hemleyêk daybî destpêkerdiş, bi çalakîya Şemzînanî zî hemleya xo qedênaye û bilançoya hemle aşkere kerde.
Ser nameyê Fermandarîya Warê Zagrosan ya HPGyî, Endamê Fermandarîya Qerargehê Merkezî yê HPGyî Amed Malazgîrtî ser bêtelî de qiseykerdişêk kerd. Malazgîrtî destpêkê qiseykerdişê xo de heme hêzê ke beşdarê hemle bîyî, serkewtişê înan pîroz kerd.
Malazgîrtî dîyar kerd ke hemle 8ê Hezîrane de bi çalakîyanê qezaya Çelê ya Colemêrgî dîyaybî destpêkerdiş û wina dewam kerd: “Çalakîyê ke ser rayîrê Çelê û Colemêrgî de bîyî, çalakîyê sabotajî ke Esendere de bîyî, reyna çalakîya Şemzînanî û derbeyê ke Govendê û Xapûşkê de dîyayî dişmenî ro û sewbîna xeylê çalakîyê bînî ameyî viraştiş û derbê giranî dîyayî dişmenî ro. Vera nê çalakîyan de artêşa tirkî 6ê temmuze de hewl daye Başûrê Kurdistanî dagîr bikero û seba nêyî operasyon daybî destpêkerdiş. Vera nê operasyonî de qasê 26 rojan gerîla xover da û artêşe vînîbîyayeyanê girdî dayî. Netîceyê operasyonî de mecbûr mendî ke tepîya biagêrî.”
Bi çalakîya Şemzînanî hemle qedîyaye
Malazgîrtî dewamê qiseykerdişê xo de wina va: “Wexto ke dewleta tirk vatêne ‘ma gerîla qedêna’ ser rayîrê Çelê û Colemêrgî de çalakîyê bitesîrî ameyî viraştiş û merhaleyo 2. yê hemle dîya destpêkerdiş. Raştîya xo de nê çalakîyan ver artêşa tirk şaş mende. Dima ra merhaleyo 2. yê hemle de derbeyêka girde dîyaye alayo ke Rûbarokî de yo ro. Artêşe seba ke vernîya çalakîyan bigîro, Oremar, Sumbul, Cîlo, Adilbeg, Barzan û Xeregol de operasyon dayî destpêkerdiş. Herçiqas ke nê operasyonî dewam kenî, labelê nê operasyonan de 100 ra zêde leşkerî merdî. Gerîlayan dîmenê çalakîyan antî û resnayî rayapêroyî. Bi çalakîyê ke vera qereqolê Çeman, Begijne û Bêluta de bîyî, merhaleyo 2. yê hemle resa zîrve û embazan mîyanê xo de munaqeşe kerdî û qerarê qedênayîşê na hemle girewtî.”
Malazgîrî peynîya qiseykerdişê xo de heme şehîd û gerîlayê ke kede dayî pîroz kerd.
Xeylê leşkerî merdî
Bîlançoya hemleya ke nizdîyê 5 aşman dewam kerde, wina ya: Gerîlayî 424 çalakîyî viraştî. Netîceyê nê çalakîyan de 1203 leşkerî kişîyayî. 290 leşkerî zî birîndar bîyî. 40 wesayîtê zirxinî ameyî îmhakerdiş. 14 wesayîtê ke viraştişê rayîr û qereqolan de şuxilîyayênê, ameyî îmhakerdiş. 1 helîkoptera Skorsky dîyaye waro û derbe dîya 3 helîkopteranê bînan ro. Artêşa tirk 112 reyan vera warê Zap û Zagrosan de hêrişê topan kerde û hêrişê tanq, hewan û obusan bêmabên dewam kerd.