Hemserekê Şaredarîya Bajarê Girdî yê Amedî Gultan Kişanake û Firat Anli, Hemsereka Şaredarîya Hezroyî Guler Ozavci Doguye ra pîya xêlê Azayê Meclîsê Şaredarî û xêlhe kesê bînî beşdarê merasîmê hîmeştişî bîyî.
Kişanake: Çi beno wa bibi xizmetê ma dewam kenê
Dima ra Hemsere Gultan Kişanake qisey kerd. Kişanake îzah kerd ke mîyanê hende zemetîyan de çîyê rindî zî benê, ewro tîya de semedê Hezroyî xebatêka weşe bena û wina va “ Şaredarî bi îmkananê kêman xebata binawanî kena. La ma gereke baş bizane ke xebatê binawanî eke cuya bajarî hetê sosyal û kulturî ra mird bibo manaya nê xebatan esta. O semed ra na bînaya xizmetî hem semedê xebatanê kulturî hem zî semedê xebatanê cinîyan muhîm a. Cinî, ciwan û gedeyî do na bîna ra feyde bivînê. Eke ma çiqas qedr û qiymet bide cinî, ciwan û gedeyan sibarojê ma hende beno qewetin. Nameyê cayî, Cayê Cuye yo. Tercîxê ma zaf zelal o. Ma hetê cuye kenê. Seke ma zanê nê rojan de zaf zêde xebera merdişan yena. Her roj dyikî gedeyanê xo vindî kenê. La ma qayîlê wa merdiş ney, ciwîyayîş bibo. Vernîya ma de çi zehmetî bibê wa bibê ma rayîrê xo ra nêvêrenê. Ma do xizmet bike û şarê xo rê bibê feydeyîn."
Anli: Wa şarê Hezroyî rê xeyrîn bo
Hemserek Firat Anli zî waşt w ana bîna cinî û ciwanan rê xizmet bikero û wina va “Eke wina yew çî bibo ma pê zaf şa benê. Ma do semedê qeza û dewanê xo xizmetanê xo bidomnê. Seke ma zanê ma pêro rojanê zehmetinan ra derbaz benê. La peynîya tengî rehetî ya. Ma nika Hezro ra veng danê. Wa her kes semedê wicdan, edelet, feraset û sibarojê xo reyna biewno pratîkê xo. Hezro, Farqîn, Licê, Amed, bi kilmekî sibarojê şarê ma û herêma ma roşnî yo. Wa no ca şarê Hezroyî rê xeyrîn bo."
Cayê Kultur û Cuye Cadeyê Şehîtlîkî ser o awan bîyo. Cayê kulturuî yewê xo war pêroyî de 2 qat o. 2 hezar û 500 metrekare ca ser o awan beno. Qata warî 547, 72 metrekare, qata yewine zî 515,47 metrekare yo. Pêroyî de 63 metrekare yo. Mîyanê cayî de: Salona konferansî, kafeterya,şêwirmendî, cayê kuaforî û atolyeya teştiş û neqişkerdişî, cayê kaykerdişê gedeyan, mescîd, odeya şitdayîşî, kitabxane, odeya komputure, odeya parekerdişê zanayîşî, ofîsê xebityayîşî û edeya îdareyî.
Cayî rê 1 milyon 93 hezar lîre mesref şino. 514 hezar û 142 lireya ci hetê Şaredarîya Bajarê Girdî ra, 524 hezar û 678 lîreya ci Hetê Ajansê Qerecedaxî, 54 hezar û 674 lîreya ci zî hetê Şaredarîya Hezroyî ra şino.
AMED