Hinara Pirsûsî ke bi tehmê xo yo meyxoşî namdar a, nika problemê awe û nêweşîyan ver her ke şono çinî bena. Qezaya Pirsûsî ya Riha de bitaybetî taxa Alîgorî de bexçeyê hinaran zaf î, labelê nê bexçeyî yew bi yew çin benî.
Berardoxan ra Bozan Kîpî va ‘verê cû dewa ma hinarêran ra nêasayêne’ û wina dewam kerd: “Verê cû qeza de zafaneyê kesan debara xo bi hinaran kerdêne. Labelê nika probleme awe esta û xeylê dewijan bexçeyê xo hewanayo. Verê bîrê ma estbîy, mi zî hinarêrê xo ewja de ronaybî. Dima ra mi awa xo kiriştêne kişta darî. Nika awe ameya Pirsûs, labelê seba bexçeyê mi girê nêdaya. Hetêk de 23 dolim hêgayê mi binê awe de mendo, heto bîn de zî bexçeyê mi bêawe yo.”
Kîpî dewamê qiseykerdişê xo de dîyar kerd ke bexçeyê ci de 710 hebî hinarêrî estî û wina domna: “Mi nê hinarêran ra verê cû 36 ton hinarî hewanayêne. Labelê ez do emser tayê daran veja. Çimkî wexto ke nêweşîye kewena dare, darû pere nêkeno. Her ke ez dare darû kena, 700 TL pere şono. Seba girêdayîşê xeta awe tayê kesî ameyî, labelê çare nêdî. Eke wina dewam bikero, ez do daranê xo veja. Ez do herinda hinaran de cew û xele rona. Hinara Pirsûsî ver bi çinîbîyayîşî de ya.”
MA / RIHA