Qandê nay heme çî kerd û kerdê. Heme îmkanê dewlet seferber kerdî. Cayê en qîmetin ê dewleta tirk rotî û pêşkeşê quwetanê gird kerdî. Qandê vera PKK vejiyê, heme keverî quwetanê gird rê akerdî. Hetê ra Amerîka, Israîl û Ewropaya, hetê ra Rûsya, Îran û welatanê Ereban hetkarî kerdê. Eynî wext de, bi quwetanê ciya ê dinyaya îdarekerdin, karê her partî û hukumetî nêbi. Labelê AKP no het de, wayirê qabîliyetê girdî bî.
AKP siyasetê meşgûlkerdin de zî, wayirê qabîliyetê girdîbî. Çiyê nêkerdê, labelê zeki ‘xeylê çiyê kerdê û kena’ dayê mûsnayin. Komkiştenî û qirkerdinê siyasî viraştê, kes û çoşmeyê bînî sûcdar kerdê. Heme karê lêmînî kerdê û heme rayanê lêmin ra şiyê. Vejiyayê kesê komkişteni viraştê, pîroz kerdê. Labelê pey ra zî werîştê xo pîr û pak mûsinayê.
Saziyê esasî ê dewlet girotîbî binê kontrolî. Bi vatena bîna, AKP bîbî dewlet û dewlet bîbî AKP. Nay het, zafê medya tirk zî girotîbî binê kontrolê. Coka hem Erdogan û hem zî rayverê AKP, emel kerdê, iyê bişê PKK tasfiye bikirê. Xora bi her wesîleya vatê; ‘heme saziyê dewlet, AKP het ca genê. Amerîka, Israîl, Ewropa, Rûsya, Îran û welatê Ereb desteg danê ma’. Bi rastî zî winî bi. Heme quwetanê gird desteg dayê AKP. Quwetanê gird wastê ‘xeta Îslamiyetê nerm’ berê ravey. Bi destê AKP û xeta ‘Îslamiyetê nerm’ Rojhilatê Miyanî goreyê wasten û menfatê xo dîzayn bikirê.
Quwetanê gird, verniyê xeta xo de, Hereketê Azadiyê Kurd zey asteng diyê. AKP zî, tam goreyê ena wastena quwetanê gird ê dinyay hereket kerdê. Coka zî heme hetan ra destegê înan girotbi. Bi xoverdayişê Rojawan, destegê teverî qediyabo zî, qandê Vakur destegê teverî hewna dewam kerdê. Coka omidê ci girdbi. Emel kerdê aya wextê zaf kilmî miyan de, peyniyê Hereketê Azadiyê Kurd biyaro. Coka planê 2023 kerdê. Coka Erdoganî xo hinî zey ‘Ataturkê diyin’ diyê. Coka tim qalê ‘Tirkiyeya Newî’ kerdê. Erdogan û AKP, weçînayinê 7’ê hezîrane, zey êşiga peyin ê ‘Tirkiyeya Newî’ diyê. Wastê HDP binê bendê weçînayinî de biterno û bi 400 wezîrana, heme çî temam bikiro. Coka verê weçînayinî heme îmkanê dewlet vera HDP seferber kerdî. labelê weçînayinê 7’ê hezîrani de, bi serkewtinê HDPe, heme planê înan xeripiyay.
Erdogan û AKP badê weçînayina zî, konseptê lejê zaf-hetinî vist dewre. Plan kerdê, iyê bi leja miyaneyê Hereketê Azadiyê Kurd bişkinê. Zey lejê Sûriye, Şorişê Rojawan û weçînayinê 7’ê hezîrane, konseptê lejî de zî, çiyê nêpawit vejiyay verniyê ci. Gerîlayan wextê kilmî miyan de, darbeyê girdî day dewleta tirk ro. Gerîla heme planî pûç vetî. Omidê Erdogan û AKP şikina. Nay ser AKP kewt rayanê newî pey. Coka zey Tansû Çîller omidê xo koruciyana girê da. Coka rojanê peyinan de bi koruciyana kombiyayişan virazena. Coka serkoruciyan, zey lîderê eşîran mûsnena û wastenê înan zey wastenê şarê kurd mûsnena. Wextê Tansû Çîller de, serkorucu Tahîr Adiyaman û Sedat Bucakan çiqas şarê kurd û eşîrî temsîl kerdê, nika zî serkoruci Hazim Babat hend eşîran û şarê kurd temsîl keno.
Memed DREWŞ