Tarîxê Kurdistanî de taybetî Bakurê Kurdistanî de nê rojî, rojê tewr muhîm î. Kam kam o sey awa zelal vejîyeno werte. Kam lîşîn o, kam bi rastî faşoyê tirk o, kam mûnafiq o û xo zey misilmanî dano musayîş, kam tersok o, kam pereperest o, kam bêexlaq o, kam dişmenê Kurd û Kurdistanî yo, kam welatperwer o, kam merdime rojê tengîyo eşkera vejyeno verê çimê herkesî. 

AKP, senî 24 Temûzê 2015 de hemberê Kurd û Kurdistanî şerêk newe da destpêkerdiş, herkesî hêdî hêdî hetê xo belî kerd. Ayê ke bi lezî rîyê xo yê gonîwer û tirkperest da nîşandayîş Hîzbulkontra-Hûdaparî bî.  Sey partî beşdarê weçînayîşê 1’ê Mijdarê 2015 nêbîyê. Raste rast reyê xo dayî kemalîsta kewe AKP. 

Pêronê qiseyê înan bi qiseyê AKP’yîyan ra bi yew. Qiseyê Hîzbulkontra Hûdaparîyan û MHP’yîyan zî bi yew. Nika wexto ke yew AKP’yî, Hîzbulkontra Hûdaparî û MHP’yî qiseybikero, nameyê partîya xo nîdo, sey şexsî nêyero şinasnayîş, yew vano tûrkeşçî qiseykenî. Yew vano yew faşoyê tirk qiseykeno. Hûdaparî hina bîyê dişmenê şarê kurdî ke, wexto ke yew hayî çapamenîyê xo de vila kenî, vanî yew PKK’yî yo ke ina ina lîste de ca girewtê ame kiştiş. JÎTEM’cî senî derheqê şarê kurdî de hayîyê xirab vilakenî, Hîzbulkontra Hûdaparî înan ra xirabêr hayîyan vila kenî.  Tena hayî ney. Yew bi yew gerreyê kurdê welatperwer kenî. Şirîkayê AKP-MHP-arteş û polîsê tirk-MÎT-JÎTEM’î kenî. Wexto ke yew kurd yeno kiştiş vanî,“oxweşşş!” Çiqas dişmenîyê şarê kurd kenî, AKP zî ewqasî înan mîyanê dewleta dagîrker ya tirk de ca kena. AKP-MHP kurdê welatperwer şaredarîyan ra dûr visnenî, cayê înan de gureyî danî Hîzbûlkontra Hûdaparîyan. Nika Kurdistanî de tetîkkeşîya dewleta tirk Hîzbulkontra Hûdaparî kenî. 

 Teberê Hîzbulkontra Hûdaparîyan de tayî korucî (çete) zî vanî  ma ra roj vejîyayo. Vanî keys no keys o ma hetê AKP û dewleta tirkî de weşêrî ca bigerî, ma zêdayîr pera genî. Pê nê hişê kewnî vernîyê esker û polîsê tirkî hemberê gerîla şer kenî. Tayî zî verê cû çete nêbî, no wextî de şîyê bîyê çeteyê AKP û dewleta tirk.  Kewnê pey gerîla û kurdê welatperwer. Gonîya şarê kurdî rijnenî. 

 Hîzbulkontra Hûdaparî û çeteyê ke hina kenî, vanî qey heme çîy ma rê bimano.  La nêzanê mîyanê şarê kurdî de yew qisey beno. Şarê kurd vano, “Hereketê Serbestî siba ra verdano, la yewî ra nêverdano.” Raştîya nê qiseyî esta. Wexto ke yew karê kiştişî bikero, rojêk bêro do hesab zî bido. 

Vateyêk bîn yê baw û kalanê ma zî esta. Baw û kalanê ma vato, “Kam çi biramo, ayê çîyê zî çîneno.”