Hozat vat, eki AKP goreyê rihê çareserîn hereket bikiro û cewab bido mesaja Ocalanî, meseleya kurd çareser bibo û Tirkiye jî bibo modelê çareserîn.
Hevseroka Konseyê Rayverîn ê KCK"î Besê Hozat quncika xo ê Ozgur Gundemî de Newroz û mesaja Ocalanî girot dest.
Hozat bi sernameyê "Newroz û vengdayişê tarîxî" de Newrozê emserî, zey Newrozê bi heybet û wayirê mahneyê girdî hesibinayo û wina vato: Sirê Newrozê emserî, manîfestoyê aştî û zeypêyinê şarano Ena mesaj bî sebebê Newrozê gird ê hetanî nika. Vengdayişê aştî, birayin û demokrasî ê Rayver Apo, şahîdînê mîlyonan de waniyê. A mesaj zeriya şaranê Tirkiye kerd germ û Newroz vist zeriya şaranê Tirkiye.
Hozat tewrbiyayinê mîlyonan ê Newrozî, zey hesretê azadî hesibinayo û wina vato: Hinî eşkere vîniyeno, şarê kurd, şarê Tirkiye û cenî wazenê Rayver Apo xo miyan de bivînê. Ê rind zanê ki, aştiyê rastîn ancax bi azadiyê Rayver Apo mumkun o.
Hozat eleqe anto talukeyê qisanê Erdoganî ser jî û vato: 'Erdogan raya felaketî akeno. Erdogan vano "meseleya kurd çiniya". Vano "heyeta çimdar nêbena". Erdogan vano, "pêdiyinê Dolmabahçe şaş bi". Vatenê Erdogan mûsnenê, zîhniyetê dişmenê kurdan, qe jew wext çareserînê demokratîk hezim nêkenê. Çiyê bîn, gerek ma ziyeretê Erdogan ê Erebistanê Siûdî sero jî vindirê. Erdogan wija bi kamiya û pêdiyinê senînî viraştî? Herkes zano, Tirkiyeya piya, Erebistanê Siûdî û Katar jî, werte-vetinê DAIŞ de rolê gird kay kerd.
Besê Hozat nûsteyê xo bi enê ayakerdinana qedînayo: Eki AKP zey verî, nika ra tepiya jî, goreyê zîhniyetê Erdogan hereket bikiro û nezdiyê demê çareserîn bibo, o çax raya kaosê girdî û lejê bêkontrolî abiyo. Lejê winayino hem peyniyê AKP biyaro û hem jî Tirkiye vera felaketê bê-ageyrayin bero. La belê eki, goreyê manîfestoyê Newrozê Amedî hereket bikiro, meseleya kurd çareser bibo û Tirkiye demokratîk bibo. Eynî wext de, Tirkiye qandê Miyanê Rojhilatî bibo jew welatê model û nimûne.
NAVENDA XEBERAN